"Қувонч" Оилавий болалар уйи – болажонлар қувончи маскани
Чирчиқ шаҳрида олий жаноб, меҳри дарё фуқароларимизнинг саъй ҳаракати билан беш нафар ўғил болалар 14-сонли Меҳрибонлик уйидан Оилавий болалар уйи сари йўл олишди. Маҳфуза Курганбаева "Қувонч" Оилавий болалар уйини ташкил этиб, Асадбек, Сирож, Бахтиёр, Георгий, Азизбек сингари болажонларни ўз оиласи бағрига олди. Уларни Оилавий болалар уйида шаҳар ҳокимлиги, Миллий гвардия Тошкент вилояти бўйича бошқармаси ва бошқа мутасадди ташкилотлар вакиллари қарши олишиб, ўзларининг совға-саломларини топширишди.
Маҳфуза опанинг ўғиллари 6 нафар бўлди. Энди болажонлар оила муҳитида, шаҳардаги "Амир Темур" маҳалласида униб ўсади.
Ушбу масканда болажонлар учун барча шароитлар яратилган. Ака-укалар биргаликда кунларини мароқли ўтказишади. Бугунда ёзги таътил бўлсада, лекин улар ўз устиларида ишлашни тўхтатишмаган. Бириси IT технологиялари бўйича тўгаракларга қатнаса, яна бириси доимий спорт билан шуғулланиб келади.
Шунингдек, ўсмирлар соғлом улғайиши учун мунтазам равишда сузиш тўгаракларида қатнашади. Шуни таъкидлашимиз керакки, юртимизда амалга оширилаётган бу каби хайрли ислоҳотлар болажонларимиз бахту камоли учун хизмат қилади ва кўплаб оилаларга қувонч улашади.
