Ромитан туманида яна бир мактабнинг қўшимча биноси фойдаланишга топширилди
Юртбошимиз таъкидлаганидек, таълим соҳасини ислоҳ қилиш бугун ҳукуматимиз диққат эътиборида турган долзарб соҳалардан бири, десак муболаға бўлмайди. Сўнгги йилларда мактабгача таълим ва мактаб таълими тизимини ислоҳ қилиш ва ривожлантиришга қаратилган қонунлар, қарорлар қабул қилиниб, амалиётга жорий этилмоқда.
Хусусан, Ромитан туманида жами 44 та умумтаълим мактаблари мавжуд. Улардан 43 таси давлат умумтаълим мактаблари, 1 та нодавлат (яъни Фарҳод-фармон) хусусий мактаби бўлиб ҳисобланади. Ҳозирги кунда тумандаги умумтаълим мактабларида 23 980 нафар ўқувчилар таълим-тарбия олиб келмоқда.
Бугун, 19 ноябрь куни туманнинг Шўрча маҳалла фуқаролар йиғинида жойлашган 18-сонли умумтаълим мактабининг 450 ўринли қўшимча янги ўқув биносини очилиш маросими бўлиб ўтди.
Тантанали очилиш маросимида туман ҳокими бошчилигидаги сектор раҳбарлари, Миллий гвардия масъуллари, маҳалла еттилиги, фаоллар, нуроний отахонлар, ёшлар, фахрий ўқитувчилар, мактаб жамоаси ва оммавий ахборот воситалари вакиллари иштирок этди.
Очилиш маросимида сўзга чиққанлар, сўнгги йилларда Юртбошимиз ташаббуси билан мамлакатимизда мактаб таълимини ривожлантириш, ёш авлодни муносиб шароитларда ўқитиш, замонавий билим ва кўникмаларни эгаллаш имкониятларини янада яхшилаш борасида амалга оширилаётган ислоҳотларга алоҳида тўхталди ва янги ўқув биноси билан мактаб жамоаси, ўқувчилар ва ота-оналарни муборакбод этди.
Сўнгра меҳмонлар янги қуриб битказилган ўқув биноларида, синф хоналарида ҳам бўлишиб, ўқувчиларга яратилган шарт-шароитлар билан яқиндан танишдилар.
Шундан сўнг, “Яшил макон” умуммиллий лойиҳаси асосида экилаётган дарахт кўчатлари униб ўсиб ушбу ерлар боғу роғларга айланишини, юртимиз тинчлигини, фаровонлигини тилаб дуолар қилинди ва олиб келинган турли хил манзарали кўчатлар масъул раҳбарлар томонидан ерга қадалди.
Маълумот учун, мактабнинг қўшимча уч қаватли янги ўқув биноси инвестиция маблағлари ҳисобидан «Умарбобо» масъулияти чекланган жамияти қурувчилари томонидан амалга оширилган қурилиш-бунёдкорлик ишларига 3 миллиард 968 миллион сўм маблағ эвазига бунёд этилди.
Ушбу мактабда янги ўқув биноси ва спорт залининг қурилиши баркамол авлодни ватанпарварлик руҳида тарбиялаш, маънавий-ахлоқий муҳитини соғломлаштириш ва миллий қадриятларимизни кенг тарғиб этиш, уларни ватанимизнинг муносиб фуқаролари, маънавий етук инсонлар қилиб тарбиялашда, таълим тизимини ривожлантиришда самарали хизмат қилади.
