Давлатимиз раҳбарининг ташаббуси билан бугунги кунда ногиронлиги бор, ота-она қарамоғидан маҳрум ва етим болаларни давлат томонидан қўллаб-қувватлашнинг янги босқичи йўлга қўйилди. Қисқа давр ичида олиб борилган амалий ишлар натижасида меҳрибонлик уйлари тарбияланувчилари ота-она меҳридан баҳраманд бўлишдек, бахтга етишишди.

Хусусан, Самарқанд вилоятида вилоят ҳокимлиги, Миллий гвардия Самарқанд вилояти бўйича бошқармаси, Халқ таълими бошқармаси ва қатор ҳомийлар томонидан олиб борилган тизимли ишлар ва тарғибот тадбирлари натижасида Самарқанд шаҳридаги 1 сон Меҳрибонлик уйи эшиклари буткул ёпилди ҳамда ушбу муассасадаги барча болажонлар йиллар давомида орзиқиб кутган ўз ота-оналари ва оилаларига эга бўлдилар.

Йил сўнггида Пастдарғом туманининг "Катта найман" МФЙ да 1-сонли Оилавий болалар уйи очилди. Жўраевлар оиласи 6 нафар ўғил-қизларни ўз бағрига олишиб, яна бир катта савобли ишларга қўл уришди.

Шунингдек, тумандаги Маданий юриш маҳалласида сўнгги 2-сонли Оилавий болалар уйи очилди. Ишанкулов Салиижон ва Ҳамроева Гулноза яхши ниятлар ила оиласи бағрига 5 нафар меҳрибонлик уйи тарбияланувчиларига ўз ота-оналик меҳрини улашиш мақсадида қабул қилишди.

Қайд этиш керакки, шу кунга қадар Самарқанд вилоятида жами 9 та Оилавий болалар уйи ташкил этилган бўлиб, меҳрибонлик уйида тарбия топаётган жами 98 нафар тарбияланувчилардан 53 нафари Оилавий болалар уйига топширилди. 9 нафари фарзандликка берилди, 5 нафари васийликка ва 9 нафари патронатга топширилган бўлса, яна 18 нафари ўз оиласи бағрига қайтарилган. Қувонарлиси болажонларнинг 4 нафари академик лицейларга ўқишга киришган.

Оилавий болалар уйига топширилган меҳрибонлик уйи тарбияланувчиларининг кўзларидаги қувончни кўриб, уларнинг эртанги кунга бўлган умиди ва ишончи янада мустаҳкамланиб бораётганини ёрқинроқ ҳис этиш мумкин.