Санкт-Петербургда бўлиб ўтган V Халқаро футбол турнири ғолибига айланган 22 сонли Меҳрибонлик уйи ёш спортчиларини тантанали тақдирлаш маросими бўлиб ўтди.
Миллий гвардия маънавият ва маърифат марказида бўлиб ўтган мазкур тадбирда Миллий гвардия қўмондони ўринбосари полковник С.Мамаюсупов, Мактабгача ва мактаб таълими вазири ўринбосари Т. Комилов, Ўзбекистон Республикаси Ёшлар сиёсати ва спорт вазирининг ўринбосари Ш.Махмудов, Ўзбекистон Республикаси Футбол ассоциацияси 1-вице президенти Р.Ирматов, Миллий Олимпия қўмитаси бош котиби О.Қосимов, мураббий ва ёш спортчилар ҳамда 22-сонли Меҳрибонлик уйи тарбиячи ва тарбияланувчилари иштирок этишди.
Тадбир қўмондон ўринбосари С.Мамаюсупов томонидан кириш сўзи билан очиб берилгандан сўнг “Россия Федерациясининг Санкт-Петербург шаҳрида бўлиб ўтган V-Халқаро форум доирасида спортнинг Мини-футбол тури бўйича мусобақа ғолибларини тақдирлаш тўғрисида”ги Миллий гвардия қўмондони буйруғи ўқиб эшиттирилиб, унга кўра ёш қаҳрамонларимиз ва уларнинг мураббийларига қимматбаҳо совғалар топширилди.
Табрик учун сўз олган меҳмонлар, ёш футболчиларимиз ушбу Халқаро мусобақада ғолибликни қўлга киритиб, ўн икки ёшидаёқ юқори ареналарда мамлакатимиз мадҳиясини янграшига ҳисса қўшганликларини ҳақиқий қаҳрамонлик дея эътироф этишди.
Спорт вазирлиги ва Футбол ассоциацияси мутасадди раҳбарлари ушбу ёш авлод Ўзбекистон футбол терма жамоасининг бўлғуси номзодлари эканлигини таъкидлашди.
Ишонамизки, ёш спортчиларимиз яратилаётган имкониятлардан самарали фойдаланиб, эришган ютуқлари билан чекланиб қолмасдан, бу борадаги шонли анъаналаримизни муносиб давом эттиришади ҳамда жаҳон спорт ареналарида Янги Ўзбекистон байроғини янада баланд кўтаришади.
