Миллий гвардия Марказий девони вакиллари Фарғона вилоятидаги оилавий болалар уйи фарзандлари холидан хабар олди
Миллий гвардия Марказий девонининг масъул ҳарбий хизматчилари Фарғона вилоятига хизмат сафари давомида оилавий болалар уйларидаги яшаш шароити билан танишиб чиқишди. Масъуллар Қўштепа туманидаги Аминовлар, Тошлоқ туманидаги Каримқуловлар, Фарғона туманидаги Рўзибоевлар ҳамда Фарғона шаҳридаги Рахмоновлар оиласига ташриф буюришди.
Болалар билан суҳбат уларнинг яшаш шароити, таълим-тарбияси, қайси спорт тўгаракларига қатнашишлари ҳақида маълумот берди. Шунингдек, болалар ва оила аъзолари орасидаги муносабатга ҳамда мактабдаги муносабатларга алоҳида эътибор қаратилди. Болаларнинг яшаши, таълим олиши ҳамда қўшимча машғулотлар билан шуғулланиши учун яратилган шароитлар кўздан кечирилди.
Шунингдек, ота-оналар билан ҳам дўстона суҳбат қилинди. Уларга юридик масалаларда тавсия ва маслаҳатлар берилди ҳамда қандай қилиб катта синфда ўқийдиган болаларни мустақил ва ўз ҳатти-ҳаракатларига жавоб берадиган қилиб тарбиялаш кераклиги ҳақида керакли тавсиялар берилди. Бундан ташқари, ота-оналар ўсмирларни касбга йўналтириш ҳамда болаларнинг истеъдод ва қобилиятларини аниқлашда ёрдам бериш масалаларида кўмак беришларини сўрашди.
Ташриф давомида Миллий гвардия вакиллари болалар ва ота-оналарнинг бошқа саволларига ҳам жавоб беришди, шунингдек, ота-оналар томонидан таъкидлаб ўтилган долзарб муаммоларни назоратга олишди.
