Соғлом оила - фаровон ҳаёт асоси
Юртимизда аҳоли саломатлигини сақлаш бўйича олиб борилаётган ислоҳотлар жадал суръатларда давом эттирилмоқда. Оналар ва болалар саломатлигини мустаҳкамлашнинг устувор йўналишлари давлатимизда қонун билан кафолатланган. Таъкидлаш жоизки, ота-она қарамоғидан маҳрум бўлган болаларнинг саломатлиги ҳам алоҳида назорат остида.
Хусусан, Учтепа туманининг 300 мингга яқин аҳолисига хизмат кўрсатувчи кўп тармоқли марказий поликлиника томонидан Найман маҳалласида жойлашган оилавий турар-жой мажмуасида истиқомат қилувчи оилавий болалар уйининг фарзандларига ҳам мунтазам равишда тез ва сифатли тиббий хизмат кўрсатиб келинмоқда. Тарбияланувчи болалар бу ерда бир йилда икки маротаба тўлиқ тиббий текширувдан ўтказиб борилади. Шунингдек, болаларга кўрсатиладиган барча тиббий хизматлар, ногиронлиги бўлган болаларни тарбиялаётган оилавий болалар уйига маслаҳат ёрдами ва бошқа ёрдам кўрсатиш ҳамда уларни қўллаб-қувватлаш давлат томонидан бепул амалга оширилади.
Оилада фарзандлар саломатлигини сақлашни энг муҳим вазифа деб ҳисоблайдиган Наргиза опа ҳам мамлакатимизда оналик ва болаликни муҳофаза қилиш масалалари, шунингдек, соғлиқни сақлаш тизимининг оналар ва болалар ўртасида касалликлар профилактикаси, уларни барвақт аниқлаш ва соғломлаштириш дастурларини амалиётга жорий этилаётганилигини алоҳида эътироф этди.
Дарҳақиқат, ёш авлоднинг соғлом ва баркамол бўлиб вояга етишлари келгусида юртимиз равнақига ҳиссага қўшадиган ақлан расо ва маънан етук ёшларни кўпайишида муҳим роль ўйнайди. Айниқса, ота-она қарамоғидан маҳрум болаларнинг саломатлигини сақлаш, уларни бу борада изчил қўллаб-қувватлаш бош ислоҳотларимизнинг асосий мезонларидан биридир.
