МЕҲРИБОНЛИК БОЛАЛАР МУАССАСАЛАРИ ТАРБИЯЛАНУВЧИЛАРИНИ ҚЎЛЛАБ-ҚУВВАТЛАШ ТИЗИМИНИ ЖОРИЙ ҚИЛИШ БОРАСИДАГИ ИШЛАРИНИ ЎРГАНИШ НАТИЖАЛАРИ БЎЙИЧА КЕНГАЙТИРИЛГАН ВИДЕОСЕЛЕКТОР ЙИҒИЛИШИ ЎТКАЗИЛДИ
Тошкентда етим ва ота-оналар қарамоғисиз қолган болаларнинг ижтимоий мослашувини таъминлаш борасидаги ишларни ўрганиш натижалари муҳокамасига бағишланган йиғилиш бўлиб ўтди.
Видеоконференцалоқа тарзида ўтказилган йиғилишда Ўзбекистон Республикаси Олий Мажлиси Сенати, Бош прокуратура, Халқ таълими вазирлиги ва Миллий гвардия вакиллари ҳамда шаҳар ва туман ҳокимликларининг болаларни ҳимоя қилиш секторлари мутахассислари қатнашди. Йиғилишни Миллий гвардия қўмондони ўринбосари, полковник С.Мамаюсупов олиб борди.
Кун тартибидаги масала бўйича Миллий гвардия Болалар муассасалари билан ишлаш бошқармаси бошлиғи полковник А.Пирматов, Бош прокуратура бошқарма бошлиғи С.Каримов, Олий Мажлиснинг Бола ҳуқуқлари бўйича вакили (Болалар омбудсмани) С.Раҳматов, Халқ таълими вазирлиги Ижтимоий ҳимоя ва болаларни қўллаб-қувватлаш бошқармаси бошлиғи Ф.Аҳмедов, Жамоат хавфсизлиги университети Ҳарбий ватанпарварлик, маънавий-маърифий тарбия ва ёшлар билан ижтимоий ишлаш кафедраси бошлиғи, подполковник Ш.Акрамовалар маъруза қилди.
Йиғилишда “Меҳрибонлик” уйларини ноинституционаллаштириш ишлари якуни ва ўқув-тарбия муассасалари тарбияланувчиларини оилавий болалар уйлари ва патронатга жойлаштириш тизимининг жорий қилинишини ўрганиш натижалари, мавжуд камчиликлар ҳамда уларни бартараф этиш ва тизимни янада такомиллаштириш чоралари муҳокама қилинди.
Билдирилган таклифлар ва фикрлар масъуллар томонидан эътиборга олиниб, таклифларни атрофлича ўрганиш ва уларни амалиётга жорий этиш бўйича режа ҳамда тегишли норматив-ҳуқуқий ҳужжатларни ишлаб чиқиш юзасидан топшириқлар берилди.
