Театр – маънавият ва маърифат ўчоғи
Фарғона вилоят Юсуфжон қизиқ Шакаржонов номидаги мусиқали драма ва комедия театрида янги спектакль намойиши бўлиб ўтди. Спектаклга томошабин сифатида Фарғона вилоятидаги оилавий уйлар фарзандлари таклиф этилди.
Ижтимоий ҳимоя Миллий агентлиги ва Миллий гвардия Фарғона вилояти бўйича бошқармаси томонидан ташкил этилган мазкур байрамона тадбир, болаларга яхши кайфият, ёрқин ҳиссиётлар улашиб, гўзаллик, яхшилик ва ёмонлик мавзуларида фикр юритишга ундади ҳамда оилада ва атрофдагилар билан ўзаро муносабатни шакллантириш ва мустаҳкамлашга хизмат қилди.
Мутахассислар фикрига кўра, театр намойишлари болалар учун юқори ахлоқий-тарбиявий таъсирга эга бўлиб, болаларнинг сўзлашиш қобилияти тўғри ривожланиши ва тарбиясида муҳим ўрин эгаллайди.
Маълумот учун: ҳозирги вақтда вилоятда 14 та оилавий уй фаолият юритиб, уларда умумий 65 нафар бола бахт ва меҳр топмоқда.
