Пойтахтимиздаги 22-сонли Меҳрибонлик уйи тарбияланувчиларидан иборат футбол жамоаси Халқаро I - Чехия футзал чемпионатида 16 та давлат жамоалари ўртасида фахрли 2-ўринни қўлга киритишди.
Пойтахтимизда жойлашган 22-сонли Меҳрибонлик уйи тарбияланувчиларидан ташкил топган 8 нафар ёш футбол жамоаси, Чехия Республикасининг таклифи билан жорий йилнинг 18-20 октябрь кунлари Нимбург шаҳрида бўлиб ўтган ва 16 та давлат Меҳрибонлик уйлари тарбияланувчилари ўртасидаги Халқаро I - Чехия футзал чемпионатида фахрли 2-ўринни қўлга киритишди. Мусобақа муросасиз беллашувларга бой бўлиб, тарбияланувчиларимиз "В" гуруҳнинг барча босқичидаги 7 та ўйинда (Словения 1 - 5 Ўзбекистон, Украина 0 - 11 Ўзбекистон, Хорватия 0 - 4 Ўзбекистон, Чехия 0 - 4 Ўзбекистон, Ўзбекистон 6 - 0 Крупка(Чехия), Латвия 1 - 2 Ўзбекистон) шунингдек, ярим финалда (Ўзбекистон 1 - 0 Словакия ҳисобида) мутлоқ ғалабани қўлга киритган ҳолда финал босқичига кўтарилишди. Финал босқичи кучли рақиб ҳисобланган Польша жамоаси билан бўлиб ўтиб, унда асосий ўйин 2 - 2 ҳисоби билан якунланди. Пеналтилар сериясида эса (3-2 ) ҳисоби ва 1 та тўп фарқи билан ёш футболчиларимиз фахрли 2 ўринни қўлга киритишди.
Миллий гвардия қўмондонлиги томонидан ушбу Меҳрибонлик уйи тарбияланувчиларига қаратилаётган эътибор ва уларнинг спорт билан шуғулланишлари учун яратиб берилган шарт -шароитлар самарасида ёш футболчиларимиздан иборат кучли жамоа шаклланиб улгурди. Хусусан, ушбу Халқаро мусобақада Максим - дарвозабон, Даниел – чап қанот ҳужумчиси, Нодир- ўнг қанот ҳужумчиси, Арслан - ҳимоячи, Намоз - ҳимоячи, Санжар - марказий ярим ҳимоячи, Игор - марказий ярим ҳимоячи, кичкина Арслан – ҳужум чизиғида тўп сурдилар.
Мазкур Халқаро чемпионатда мамлакатимиз шарафини шижоат билан ҳимоя қилган ва юқори натижага эришган 22-сонли Меҳрибонлик уйи тарбияланувчиларидан иборат ёш футболчиларимизни ва уларнинг мураббийларини Миллий гвардия қўмондонлиги ва барча шахсий таркиби номидан самимий муборакбод этамиз!
