«Инсон қалбига йўл меҳр-мурувватдан, саховатдан бошланади”!
Республика Маънавият ва маърифат маркази томонидан Қорақалпоғистон Республикаси, вилоятлар ва Тошкент шаҳрида олимлар, зиёлилар иштирокида аҳоли, айниқса, ёшлар орасида инсонийлик қадриятлари, меҳр-оқибат ғояларини кенг тарғиб қилиш мақсадида "Инсон қадри" лойиҳаси амалга оширилмоқда. Мазкур лойиҳа давомида мамлакатимизда жойлашган меҳрибонлик ва мурувват уйлари тарбияланувчилари ҳамда саховат уйларида истиқомат қилаётган нуронийлар учун маданий, маънавий-маърифий тадбир ўтказиш, уларнинг кўнглини кўтариш мақсад қилинди.
Лойиҳа доирасида пойтахтимиздаги 22-сонли меҳрибонлик уйида "Меҳр-саховат" акцияси ташкил этилди. "Инсон қалбига йўл меҳр-мурувватдан, саховатдан бошланади" деб номланган тадбирда бир гуруҳ "Маърифат" тарғиботчилари жамияти аъзолари, маданият, адабиёт ва санъат намоёндалари ҳамда меҳрибонлик уйи тарбияланувчилари иштирок этди.
Тадбирда сўзга чиққанлар меҳр-оқибат, мурувват тушунчалари асрлар мобайнида эл-юртимизнинг дунёқараши, маънавий ҳаётининг негизи сифатида вужудга келганини, онгимиздан чуқур жой олган буюк қадриятларнинг амалий ифодаси эканлигини таъкидлаб ўтишди.
Шу билан бир қаторда, акция доирасида тарбияланувчиларга ҳаётда керак бўладиган касб-ҳунарларни ўргатиш ҳам кўзда тутилган бўлиб, тадбир давомида тажрибали мутахассислар сартарошлик касбига қизиқиши юқори бўлган ёшларга касб сирларини белгиланган тартибда ўргатилишига келишиб. Шунингдек, тўқувчилик, қандолатчилик йўналишларида ҳам гуруҳлар шакллантирилди.
Шунингдек, Оила ва болалар психологи Шоира Исакова ёш ўғил-қизлар билан самимий суҳбатлашиб, психологик тренинг ўтказди. Тренинг давомида болалар ҳаётда ўз ўрнини топишларида эътибор қаратиш лозим бўлган жиҳатлар, иқтидорини юзага чиқаришда атрофдаги инсонларнинг ўрни ҳақида тўхталиб ўтиб, иштирокчиларни қизиқтирган саволларига жавоб берди.
Шу билан бир қаторда, "Маърифат" тарғиботчилар жамияти аъзолари , таниқли хонандалар ижросидаги куй-қўшиқлар, машҳур асарлардан парчалар болаларнинг қувончига сабаб бўлди.
