УЧТА БАХТЛИ ҲИКОЯ
Ўзбекистон Республикаси Давлат байроғининг 30 йиллиги ва 20 ноябрь - Бутунжаҳон болаларни ҳимоя қилиш кунида мамлакатимизнинг учта вилоятида Меҳрибонлик уйлари тарбияланувчиларидан 26 нафари ўз оиласига эга бўлди.
Қолаверса, биргина Қорақалпоғистоннинг ўзида учта оиланинг ота-она меҳридан маҳрум бўлган болаларни вояга етказиш, уларга меҳр-муҳаббат улашиш орзулари амалга ошди.
Бахтли оилалардан бири Миллий гвардия ҳарбий хизматчиси сержант Даулетназаров Женис оиласи бўлиб, рафиқаси Гоззал билан биргаликда тўрт ўғил ва икки қизни ўз қарамоғига олишди. Шу муносабат билан сержант хизмат кўрсатадиган бўлинма раҳбарияти, сафдошлари ва қўшнилари томонидан байрам уюштирилиб, унга давлат ҳокимияти органлари вакиллари таклиф этилди.
Шунингдек, Хўжайли туманида бирин-кетин иккита оилавий болалар уйлари очилди. Давлат байроғи қабул қилинган кунда Даулетмуратовлар оиласига беш нафар– бир ўғил ва тўртта қиз янги оила аъзолари сифатида қабул қилинди.
Муяссар Турсунова оиласи томонидан ҳам беш нафар фарзанд тантанали равишда кутиб олинди. Қаҳрамонимиз кўп йиллар давомида ёпиқ турдаги болалар муассасасида ишлаб келади ва у болалар байрамларни оила даврасида нишонлашни, ўз тажрибаларини ота-оналари билан ўртоқлашишни орзу қилишларини жуда яхши билади.
Болаларни тарбиялаш ҳамда уларни ўз яқинлари билан биргаликда вояга етказишни азалдан орзу қилиб келган Муяссар ва унинг бошқа вилоятлардаги ҳамкасблари - бухоролик Х.Ҳамидова ва хивалик Л.Оллабергеновалар беш нафардан тарбияланувчиларни ўз бағрига олишди.
Юртбошимиз ташаббуси билан йўлга қўйилган етим ва ота-она қарамоғидан маҳрум бўлган болаларни давлат томонидан қўллаб-қувватлашнинг янги тизими туфайли ана шу инсонлар қаторида юзлаб ўзбек оилаларининг орзуси ушалди.
Меҳрибонлик уйининг собиқ тарбияланувчилари ўз оиласига эга бўлганлиги туфайли ота-оналари билан биргаликда мевали дарахт кўчатлари ўтқазгани рамзий маънога эгадир. Бу бўлса, болаларнинг янги оилада илдиз отиши, кечаги “меҳрибонлик уйлари”дан ўз оиласида меҳр ва ғамхўрликдан суғорилган ана шу дарахтлар каби ўсиб, гуллаб-яшнашини англатади.
