Миллий гвардия Фарғона вилояти бўйича бошқармаси томонидан болалар саломатлигини тиклашга алоҳида эътибор қаратилмоқда.
Ўзбекистон Республикаси Миллий гвардияси қўмондони томонидан жорий йил 16 январь куни ўтказилган видеоселектор йиғилишида Оилавий болалар уйида тарбияланаётган фарзандларимиз саломатлиги учун Миллий гвардия вилоят бошқарма бошлиқлари шахсан жавобгар эканлиги белгилаб берилди.
Йиғилишда берилган топшириқлардан келиб чиқиб, ишчи гуруҳ аъзолари томонидан Қўштепа, Фарғона, Қува ва Тошлоқ туманларидаги Оилавий болалар уйларидаги 9 нафар фарзандга Фарғона вилояти Болалар марказий шифохонасида малакали мутахассислар билар биргаликда тиббий кўриклар ўтказилди ва тегишли муолажалар тайинланди.
Жумладан, Қўштепа туманидаги "Мустақиллик оилам – келажагим пойдевори" Оилавий болалар уйи фарзандлари Сафия ва Владимирга ҳамда "Оила бахтим қувончим" Оилавий болалар уйи фарзанди Венерага малакали мутахассилар томонидан тиббий ёрдам кўрсатилди. Хусусан, Сафия ва Венера офталмолог текширувидан ўтказилиб, тегишли таҳлиллар олинди ва жарроҳлик амалиёти ўтказиш учун ушбу шифохонанинг жарроҳлик бўлимига ётқизилди. Владимир эса лор текширувидан ўтказилиб, унга зарур муолажалар белгиланди.
Қува туманида "Саховат меҳридарё" Оилавий болалар уйи фарзандлари Лиля, Мадина ва Сўғдиёна тиббий текширувдан ўтказилиб, тегишли таҳлиллар олинди. Мадина ва Сўғдиёнага зарур муолажалар белгиланди, Лиля эса кўз операциясини қилдириш учун жарроҳлик бўлимига ётқизилди.
Тошлоқ туманида "Янги давр келажак авлодлари" Оилавий болалар уйи фарзандлари Одина ва Қобилжон ҳам тиббий текширувдан ўтказилиб, эндокринолог томонидан зарур муолажалар тайинланди.
Фарғона туманида эса "Буюк юрт фарзандлари" Оилавий болалар уйи фарзанди Муҳаммадқодир ортопед томонидан текширилиб, унга операциядан олдинги даволаниш жараёнлари белгиланди.
