БЎКАДАГИ 15-СОНЛИ МЕҲРИБОНЛИК УЙИ ЎЗ ФАОЛИЯТИНИ ЯКУНЛАДИ
Тошкент вилоятининг Бўка шаҳрида жойлашган мазкур масканда жорий йилнинг 1 июль ҳолатига кўра, 121 нафар бола тарбияланган. Бугунги кунга қадар уларнинг 20 нафари ота-онаси ёки яқин қариндошларига қайтарилган, 10 нафари васийлик ёки ҳомийликка олинган, 25 нафари Оилавий болалар уйларига жойлаштирилган, 10 нафари вилоятдаги таълим муассасаларига ўқишга кирган, ўрта ва ундан юқори босқичда 8 нафар ўқувчи вояга етмоқда, 48 нафар бола Чирчиқ шаҳридаги 14-сонли “Меҳрибонлик” уйига кўчирилган.
Бугунги кунга қадар республикада 18 та таълим муассасаси ёпилган бўлиб, шундан 12 таси Меҳрибонлик уйи, 4 таси болалар шаҳарчаси ва 2 таси Болалар уйи.
Эслатиб ўтамиз, 2021 йилнинг 9 август ҳолатига кўра, 16 та Меҳрибонлик уйи ва 4 та болалар шаҳарчасида 1900 нафар бола тарбияланган.
2021 йил 9 августдан жорий йил 2 июнгача бўлган даврда Меҳрибонлик уйлари ва болалар шаҳарчасидаги 1903 нафар бола Оилавий шароитга эга бўлди. 124 та Оилавий болалар уйида 784 нафар бола тарбияланмоқда. 189 нафар тарбияланувчи олий ва ўрта махсус ўқув юртларига ўқишга кирди, 72 нафар тарбияланувчи вояга етганлиги – 18 ёшга тўлганлиги сабабли таълим муассасаларини тарк этди.
Республикамиз бўйлаб 4 та Меҳрибонлик уйида 417 нафар ўғил-қиз ўз ота-онаси ва оиласини кутмоқда.
