Фарғона вилоятида Оилавий болалар уйи фарзандлари ҳамда маҳаллий ёшлар иштирокида "Ҳарбий қисмда бир кун" шиори остида маънавий-маърифий ва спорт тадбири ташкил этилди.
Миллий гвардия Фарғона вилояти бўйича бошқармаси, Ўзбекистон Ёшлар иттифоқи вилоят Кенгаши ҳамда Ёшлар ишлари агентлиги вилоят бошқармалари ҳамкорлигида ҳарбий касбга қизиқувчи вояга етмаган ёшлар, Оилавий болалар уйи фарзандлари, Миллий гвардияга бириктирилган тарбияси оғир ўқувчиларнинг Миллий гвардия Фарғона вилояти бўйича бошқармасига тасарруфидаги ҳарбий қисмда "Ҳарбий қисмда бир кун" шиори остида маънавий-маърифий ва спорт тадбири ташкил этилди.
Кун тартибига мувофиқ ёшлар, бошқармада ташкил этилган кутубхона ҳамда музей фаолияти, психологик хизмат кўрсатиш сифатини, ҳарбий қисмда ҳарбий хизматчилар учун яратилган шарт-шароитлар билан яқиндан танишди.
Куннинг иккинчи ярмида иштирокчилар от спорти тўгарагининг фаолиятини ўрганиб, от устида сайр қилдилар. Шу билан бир қаторда, бугунги кунда тобора оммалашаётган спорт тури бўлган камондан отиш спорт тури бўйича ҳам машғулотлар ташкил этилиб, ёшлар ўз маҳоратларини синовдан ўтказдилар.
Тадбирнинг сўнги қисмида ёшларга ташкилотчилар томонидан эсдалик совғалари ҳамда фахрий ёрлиқлар топширилди.
