Адлия вазирлигида Меҳрибонлик уйлари тарбияланувчилари учун “Менинг ҳуқуқим” куни ташкил этилди
Бугун, 26 ноябрь куни Адлия вазирлиги томонидан Бутунжаҳон болалар куни муносабати билан Меҳрибонлик уйларининг 9-11-синф тарбияланувчилари учун “Менинг ҳуқуқим” куни ташкил этилди.
Маълумот учун: 1954 йил “20 ноябрь – Жаҳон болалар куни” сифатида БМТ Бош Ассамблеяси томонидан эълон қилинган ва ҳар йили ушбу кун бутун дунё болалар куни сифатида нишонланиб келинади.
Меҳрибонлик уйлари тарбияланувчилари дастлаб вазирликнинг марказий аппаратидаги таркибий бўлинмалари иш жараёни билан танишиб, вазирлик кутубхонасига саёҳат қилишди.
Ёшлар вазирлик ва музей бўйлаб экскурция давомида ҳуқуқ муҳитига шўнғиб кетдилар, ҳуқуқшунослик тарихи, адлия тизими, органлари ва муассасалари билан яқиндан танишдилар.
Бундан ташқари, очиқ мулоқот давомида Меҳрибонлик уйлари тарбияланувчилари учун қонунчиликда белгиланган имтиёзлар, шунингдек уларнинг юридик таълимга ҳамда юридик соҳага бўлган қизиқишини орттириш мақсадида мутахассислар томонидан тақдимотлар ҳам ташкил этилди.
Ёшлар томонидан Тошкент давлат юридик университети, академик лицей ва юридик техникумларга ўқишга кириш учун топшириладиган фанлар тўплами, ўқиш жараёнлари ҳамда чет тилларига қўйилган талаблар бўйича берилган саволларга мутахассислар томонида атрофлича жавоб берилди.
Тадбир сўнгида ёшларга вазирликнинг эсдалик совғалари, жумладан, ёшлар ҳуқуқлари бўйича “Ёшлар энциклопедияси” ҳамда Ўзбекистон Республикаси Конституцияси китоблари топширилди.
Меҳрибонлик уйлари тарбияланувчиларини Адлия вазирлигига ташриф буюриши, унинг тарихи ва фаолиятини ўрганиши ҳамда мутахассислар билан мулоқот қилиши уларни келажакда ҳуқуқшунослик касбини танлашига туртки бўлиб хизмат қилади.
Адлия вазирлиги
Жамоатчилик билан алоқалар бўлими
