Сирдарё вилоятида тутинган ота-оналарни малакасини ошириш курслари якунланди
Сирдарё вилоятида тутинган ота-оналарни тайёрлаш ўқув курсларида ўқиш истагини билдирган номзодлар билан машғулотлар якунланди. Машғулотлар жорий йилнинг 20-31 август кунлари Миллий гвардиянинг Сирдарё вилояти бўйича бошқармаси базасида бўлиб ўтди. Курсни Ўзбекистон Республикаси Жамоат хавфсизлиги университетининг “Ҳарбий-ватанпарварлик, маънавий-маърифий тарбия ва ёшлар билан ижтимоий ишлаш” кафедраси профессор-ўқитувчилари олиб бордилар.
Ўқув курси бошланишидан аввал номзодларнинг эмоционал ва руҳий барқарорлик даражасини аниқлашга қаратилган психологик ташхислаш ишлари амалга оширилди. Ташхислаш ишлари натижаларига кўра, фарзанд асраб олувчиларга малака ошириш курсида ўқиш имконияти берилди.
Мазкур курслар ёрдамида тутинган ота-оналар малакали мутахассис, ижтимоий соҳа мутахассислари билан тўғридан-тўғри алоқа ўрнатиб, болани оилага қабул қилиш жараёнидан тортиб, то оила аъзоларининг ҳамда оиланинг янги аъзосининг бир-бирларига, янги муносабатларга, янги ижтимоий ҳаётга мослашиб, оилада руҳий соғлом муҳитни яратиш каби масалаларда ўз билим, кўникма ва малакаларини эгаллаш имкониятига эга бўлдилар. Бундан ташқари, ота-оналарга фарзандларининг иқтидори ва ижодий қобилиятларини аниқлаш ва юзага чиқариш усуллари ўргатилди.
Курс якунида номзодлар икки босқичли имтиҳон топширишди. Биринчи босқичда тингловичлар тугалланган курс бўйича саволларни ўз ичига олган тест синовларини топширдилар. Тест синовларидан муваффақиятли ўтиб, 2-босқичда боланинг ҳуқуқий, психологик ва ижтимоий ҳимояси масалалари бўйича суҳбат ўтказилди.
Курсларни муваффақиятли тамомлаган тутинган ота-оналарга сертификатлар топширилди.
