Ватанпарварлик тадбири Нукусдаги 50-сонли умумтаълим мактабида ўтказилди. Тадбир ҳарбий хизматчиларнинг фаолияти, махсус қурувчилар намойиши, ўқ отиш машғулотлари ва фавқулодда вазиятлардаги фойдаланиладиган асбоб-ускуналар таништириш асосида ўтди. Мазкур тадбир ёшлар орасида Ватанга бўлган муҳаббат, ғурур ва масъулият ҳисси янада кучайтиришга ёрдам берди.
Ёшларни ватанпарварлик руҳида тарбиялаш, уларнинг она Ватанга бўлган садоқат ва муҳаббатини янада мустаҳкамлаш мақсадида Ўзбекистон Ёшлар иттифоқи Қорақалпоғистон Республикаси Кенгаши, Миллий гвардиянинг Қорақалпоғистон Республикаси бўйича бошқармаси ҳамда Қорақалпоғистон Республикаси Фавқулодда вазиятлар бошқармаси ҳамкорлигида Нукус шаҳридаги 50-сонли умумтаълим мактабида ватанпарварлик тадбири ташкил этилди.
Тадбир давомида ўқувчи-ёшларга ҳарбий хизматчилар фаолияти яқиндан таништирилди. Хизмат итларининг кўргазмали чиқишлари ҳамда ҳарбий хизматчилар томонидан намойиш этилган амалий машқлар ёшлар қалбида катта қизиқиш ва унутилмас таассуротлар қолдирди.
Шунингдек, тадбир доирасида Миллий гвардиянинг Қорақалпоғистон Республикаси бўйича бошқармаси томонидан ҳарбий қурол-аслаҳалар кўргазмаси ташкил этилиб, уларнинг вазифаси ва қўлланилиш тартиби ҳақида батафсил маълумотлар берилди. Қорақалпоғистон Республикаси Фавқулодда вазиятлар бошқармаси ходимлари томонидан эса фавқулодда ҳолатларда ва тинчлик даврида фойдаланиладиган махсус техника ҳамда асбоб-ускуналар таништирилди.
Бундан ташқари, ўқувчилар учун ўқ отиш машғулотлари ўтказилиб, бу жараён ёшларнинг мерганлик қобилиятларини юзага чиқариш, жасорат ва дадиллик фазилатларини ривожлантиришга хизмат қилди.
Мазкур ватанпарварлик тадбири ёш авлодни она юртга муҳаббат, миллий ғурур ва масъулият руҳида тарбиялашда муҳим аҳамият касб этиб, уларнинг келажакда Ватан ҳимоячиси бўлиш йўлидаги интилишларини янада мустаҳкамлади.