Улғайиб келаётган авлодни тарбиялаш – миллий кадрларни тайёрлашнинг илк поғонаси
Малакали, ўз ишини яхши билган мутахассислар давлатнинг ва иқтисодиётнинг исталган соҳаси учун жуда зарур. Зеро, юқори малакали кадрлар мамлакат тараққиёти, эл-юрт фаровонлигига жуда катта ҳисса қўшади. Мутахассис тайёрлашнинг биринчи поғонаси – улғайиб келаётган ёш авлодни ҳар томонлама ривожланган шахс қилиб, дунёқараши кенг, билимдон, зийрак, жисмонан кучли, чаққон қилиб тарбиялашдир.
Бугун Тошкент шаҳридаги 22-сонли “Меҳрибонлик” уйида Миллий гвардия вакиллари болаларни спорт билан шуғулланиши, расм чизиш, рақс, китоб мутолаа қилиш ва бошқа машғулотлар ўтказишга қаратилган қатор тадбирлар уюштирди.
“Меҳрибонлик” уйи ҳудуди бир нечта майдончаларга ажратилди. Мисол учун, майдончалардан бирида болалар куч синашиб, арқон тортишди ва тош кўтаришди. Бошқа майдончада иштирокчилар қўлни белга қўйган ҳолда тиш билан дўппи кўтаришди. Миллий спорт турлари билан шуғулланиш шу даражада қизғин ўтдики, ёш курашчилар ва “лянка” ўйини ҳаваскорлари намойишлар кўрсатишди.
Шунингдек, бир томонда рассомлар танлови ҳам бўлиб ўтди. Болалар ва қизалоқларга экология, атроф-муҳитни ҳимоялаш мавзусида расмлар чизиш вазифаси берилди. Яъни, танлов иштирокчилари нафақат рассомлик қобилиятини намойиш қилиш, балки экология масаласи ҳақида билимини кўрсатиши керак эди. Болалар ситқи дилдан ҳаракат қилишди. Энг яхши расмлар “Тозалик” лойиҳасига жўнатилади ва ижтимойи тармоқлардаги лойиҳанинг ахборот ресурсларига чиқарилади.
Маънавият ва маърифат машғулотлари залида эса болалар ва қизалоқлар чинакам театрлаштирилган спектакль намойиш этишди. Театрлаштирилган миниатюралар томошабинларга нафақат болаларнинг роль ўйнашдаги қобилияти ҳақида хулоса қилиш имконини берди. Биринчи навбатда ёш истеъдодлардан миллий анъана ва урф-одатларни, жумладан, меҳмондўстлик анъаналари, тўй маросими ҳамда миллий таомлар, қўшиқлар, рақслар ва аския маҳорати кабиларни билиши талаб этилди.
Кўтаринки кайфиятда “Меҳрибонлик” уйи барча тарбияланувчиларини қамраб олган, танлов ва мусобақаларга бой тарзда ўтган тадбир ўз ниҳоясига етди. Спорт мусобақалари ғолиблари медаль ва эсдалик совғалари билан тақдирланишди. Шунингдек, бошқа танлов иштирокчилари ҳам совғасиз қолмади. Миллий гвардия Марказий девони вакиллари болаларга совға ва мукофотларни топшириб, ҳар бир қатнашувчига фаол иштироки ва ҳаракати учун миннатдорчилик билдиришди.
