Ёш авлод билан Чавандозлар мактабига саёҳат
От — миллатимиз, айниқса эр–йигитларимиз учун азалдан ор-номус ва ифтихор рамзи бўлиб келган. Ўзбекистонда, жумладан, Бухорода чавандозлик маҳорати минг йиллар бурунга бориб тақалади. Тарихга назар ташласак, бутун дунёда от спорти милоддан аввалги 680 йилдан бошлаб антик Олимпиада ўйинлари дастурига киритилгани, албатта, от спорти ва чавандозликка муҳаббат қадимдан шакллангани яхши маълум.
Айни кунларда эса, юртимизда ўсиб келаётган баркамол авлодни от спорти, замонавий бешкураш, поло ва улоқ-кўпкари билан мунтазам шуғулланишга жалб этиш, от спортига иштиёқманд иқтидорли ёшларни танлаш ва саралаш, селекция ишларини ривожлантириш, юқори маҳоратли спортчилар тайёрлаш мақсадида Миллий гвардия Бухоро вилояти Чавандозлар мактаби томонидан бир қатор саъй-ҳаракатлар амалга оширилмоқда.
Шу маънода, Миллий гвардия масъуллари томонидан ёшларнинг Чавандозлар мактабига саёҳати ташкил этилди. Тадбирга меҳмон сифатида ташриф буюрган Бухоро муҳандислик-технология институти талабалари эса болажонларга ҳамроҳ бўлдилар.
Саёҳат давомида ёшлар, от спортнинг келиб чиқиш тарихи, бугунги кунда умидли спортчиларимиз томонидан жаҳон ареналарида эришилаётган ютуқлар ҳамда ҳукуматимиз томонидан от спортини оммалаштириш борасида амалга оширилаётган тизимли ишлардан хабардор бўлиш билан бирга, спортчиларнинг машғулотлар жараёни билан яқиндан танишдилар ҳамда от устида сайр қилдилар.
Тадбир давомида, от спортига қизиқувчан ёшлар томонидан берилган саволларга масъуллар томонидан батафсил жавоблар берилди.
