СОҒЛОМ АВЛОД-КЕЛАЖАК ПОЙДЕВОРИ
Миллий гвардия Фарғона вилояти бўйича бошқармаси ва вилоят соғлиқни сақлаш бошқармаси билан биргаликда тайёрланган чора-тадбирлар режасига асосан Фарғона вилоятида ташкил этилган "Оилавий болалар уйи", патронат ва васийлик асосида меҳрибонлик уйи тарбияланувчиларини оила даврасига қабул қилган ота-оналар иштирокида тарбияланаётган болажонларнинг соғлиғини муҳофаза қилиш, касалликларни олдини олиш, шунингдек соғлом турмуш тарзига риоя этишда тўғри тавсиялар бериш мақсадида чуқурлаштирилган тиббий кўрик ташкил этилди.
Тиббий кўрикка ҳудудий оилавий поликлиникаларининг терапевт, хирург, педиатр, окулист, лор, травматолог (ортопед), невропатолог, стоматолог каби малакали шифокор мутахассислари жалб этилиб, жами 100 нафардан зиёд болажонлар учун шифокорлар томонидан тегишли текширувлар амалга оширилди.
Шу билан бир қаторда, тиббий кўрик давомида малакали шифокорлар томонидан болажонларга ҳамда уларнинг ота-оналарига соғлом турмуш тарзини шакллантиришда доимий жисмоний тарбия ва спорт билан шуғулланиш, санитария ва гигиена талабларига риоя этиш, тўғри овқатланиш рационига амал қилиш борасида тегишли маслаҳатлар берилди.
