ТИЛ БИЛГАН – ЭЛ БИЛАДИ
Гулбаҳор Хушвақтовна ва турмуш ўртоғи Бахтиёр Омоновичлар бу нақлга амал қилиб, Қарши шаҳри Иқтисодиёт институти Чет тиллар кафедраси ўқитувчиси Зуҳра Зулфикаровани хонадонига меҳмонга таклиф этди. Ташриф давомида тажрибали ўқитувчи ота-онага беш нафар фарзанднинг қобилиятларини қандай ривожлантириш кераклиги бўйича тавсиялар берди.
Болалар билан бўлган суҳбат жараёнида устоз ким қандай эртакларни яхши кўришини, ким хорижий мамлакатлар ҳақида билишини аниқлаб, болажонларнинг жавоблари асосида ўқув жараёнини қандай олиб бориш кераклигини белгилаб олди.
Зуҳра Зулфикарованинг фикрича," Гулбаҳор Алланазарованинг барча фарзандлари истеъдодли ва албатта,ҳар бири билим олишга интилади. Ота-онаси болалар билан шуғулланаётганлиги кўриниб турибди"
Гулбаҳор Алланазарова узоқ йиллар Қашқадарё вилоятида жойлашган 4-сонли Меҳрибонлик уйида ишлади. Таълим муассасасидан болаларни ўз оиласига олиш имконияти бўлганида, у турмуш ўртоғи ва катта фарзандлари билан маслаҳатлашди. Бу таклифни унинг оиласи қўллаб-қувватлади. Ўтган йилнинг ноябрь ойида Гулбаҳор Хушвактовнанинг орзуси ушалди ва уларнинг улкан, 13 хонали уйида болаларнинг қувноқ овозлари янгради.
