BERUNIY TUMANIDA HAM “OILAVIY BOLALAR UYI” TASHKIL ETILDI
Maʼrifatparvar bobomiz Abdullo Avloniy: “Tarbiya biz uchun yo hayot- yo mamot, yo najot-yo halokat, yo saodat-yo falokat masalasidir”-deya taʼkidlab, yoshlar tarbiyasiga aloxida eʼtibor qaratgan. Bola tarbiyasi barcha davrlarda muhim masalalardan biri bo‘lib kelgan. Chunki, bolalarni tarbiyalash orqali, biz kelajagimizni, ertangi kunimizni tarbiyalaymiz.
O‘zbekiston Respublikasi Prezidentining joriy yil avgust oyidagi “Bola huquqlari kafolatlarini taʼminlash tizimini yana-da takomillashtirish chora-tadbirlari to‘g‘risida”gi farmonining ijrosi yuzasidan izchil islohatlar amalga oshirilmoqda.
Jumladan, bugun Qoraqalpog‘iston Respublikasining Beruniy tumanidagi “Birlik” mahallasi Yu.Rajabiy ko‘chasida yashovchi Atabayev Bahromjon va Xadjibayeva Dilfuzaxonlar o‘zlarining 3ta o‘g‘il, 1 nafar qiz farzandi bo‘lishiga qaramasdan, Xo‘jayli tumanida joylashgan 1 – son Mexribonlik uyidan 5 nafar o‘g‘il farzandni o‘z tarbiyasiga olib, xonadonida “Oilaviy Bolalar uyi”ni tashkil etdi.
Mazkur 1 – son Oilaviy Bolalar uyining ochilish marosimiga Qoraqalpog‘iston Respublikasi buyicha Milliy gvardiya boshkarmasi boshlig‘i polkovnik M.Yusupov, Beruniy tumani hokimi O.Saparboyev, Mexribonlik uyi direktori S.Son, sektor rahbarlari va mutasaddi tashkilot rahbarlari ishtirok etishdi.
Tantanali tadbirda Qoraqalpog‘iston Respublikasi bo‘yicha Milliy gvardiya boshqarmasi boshlig‘i so‘zga chiqib, xonadon egalarini boshlagan ezgu ishlari bilan tabriklab, iliq tilaklarini bildirib, Milliy gvardiya nomidan tashakkurnoma va sovg‘alarni topshirdi.
Shundan so‘ng, tuman hokimi O.Saparboyev so‘zga chiqib, Beruniy tumanida ilk bora “Oilaviy Bolalar uyi” tashkil etilganligini taʼkidlab, bundan oldin patronaj tarzida bolajonlarni tegishli idoralar bilan hamkorlikda oila tarbiyasiga berganligi hakida aytib o‘tib, xonadonga sovg‘alarni topshirdi.
O‘z navbatida, Mexribonlik uyi direktori S.Son bolajonlarga yaratilayotgan imkoniyatlar va g‘amxo‘rlik uchun o‘z minnatdorchiligini bildirdi.
Shu bilan birga, homiylar tomonidan xonadonga sport inventarlari, kompyuter, televizor, kitoblar to‘plami sovg‘a qilindi.
Tadbir davomida tantanali tarzda lenta kesilib, mehmonlar xonadonning tomorqa yer maydoniga bolajonlar bilan birgalikda, “Yashil makon” shiori ostida ko‘chatlar ekishdi.
Bundan so‘ng, tadbir ishtirokchilari B.Atabayevlar xonadoniga tashrif buyurib, yaratilgan sharoitlar bilan tanishdi va bolajonlar bilan bir piyola choy ustida suhbat qurishdi.
