MEHRGA MUHTOJ BOLALARNI QO‘LLAB-QUVVATLASH BORASIDA AMALGA OSHIRILAYOTGAN KENG ISLOHOTLAR
Joriy yilning 4 avgust kuni O‘zbekiston kasaba uyushmalari Federatsiyasini raisi Q.Rafiqov raisligida Ayollar muammolarini tizimli ravishda hal etish, ularni ijtimoiy qo‘llab-quvvatlash bo‘yicha respublika komissiyasining navbatdagi kengaytirilgan videoselektor yig‘ilishi o‘tkazildi.
Mazkur yig‘ilishda, O‘zbekiston Respublikasi Prezidenti Maslahatchisining o‘rinbosari O.Saliyev, Milliy gvardiya qo‘mondoni R.Djurayev, Xotin-qizlar muammolarini tizimli ravishda hal etish, ularni ijtimoiy qo‘llab-quvvatlash bo‘yicha respublika komissiyasi aʼzolari, Qoraqalpog‘iston Respublikasi Vazirlar Kengashi raisining, viloyatlar va Toshkent shahar hokimlarining o‘rinbosarlari, tuman (shahar)lar hokimlari, Milliy gvardiya hamda boshqa mutasaddi idoralarning rahbar xodimlari ishtirok etdilar.
Yig‘ilish davomida "Ayollar daftari"ning ikkinchi bosqichi doirasida amalga oshiriladigan vazifalar hamda Mehribonlik uylari, bolalar shaharchalari va oilaviy bolalar uylarida tarbiyalanayotgan qizlarning muammolari, ehtiyojlarini o‘rganish hamda ularni hal etish, orzu-istaklarini ro‘yobga chiqarishga ko‘maklashish chora-tadbirlari muhokama qilinib, masʼullar oldiga bir qator ustuvor vazifalar belgilab berildi.
Kun tartibidagi ikkinchi masala yuzasidan so‘z olgan Milliy gvardiya qo‘mondoni R.Djurayev bugungi kunda mamlakatimizda yoshlarni ayniqsa, mehrga muhtoj bolalarni qo‘llab-quvvatlash borasida amalga oshirilayotgan keng islohotlarga to‘xtalib o‘tdi.
Mavzu doirasida, yurtboshimiz raisligida 28 iyul kuni o‘tkazilgan videoselektor yig‘ilishi yodga olinib, unda kam taʼminlangan oilalar hamda mehribonlik uylarida istiqomat qiluvchi bolalarni qo‘llab-quvvatlashga alohida eʼtibor qaratilganligi, shuningdek, davlatimiz rahbari tomonidan ushbu yo‘nalishda yo‘l qo‘yilgan kamchiliklarga tanqidiy baho berilganligi va bu borada yangi tizim joriy qilinib, bunga Milliy gvardiya masʼul etib belgilangani to‘g‘rida fikr yuritildi.
Shundan so‘ng, hozirda Milliy gvardiya tomonidan mehribonlik uylari faoliyatini yana-da takomillashtirish, bu yo‘nalishda tub islohotlarni joriy etish hamda muammoli masalalarni hal etish bo‘yicha amalga oshirilayotgan va rejalashtirilgan ishlarga to‘xtalib o‘tildi. Ular:
“Mehribonlik uylari” va “Bolalar shaharchalari”ga Milliy gvardiyaning hududiy boshqarma boshliqlari, har bir guruhga malakali ofitser va psixologlar biriktirilayotganligi;
Shuningdek, bolalarni vatanparvarlik ruhida tarbiyalash maqsadida Milliy gvardiyaning harbiy qismlari, poligonlari, “chavandozlar maktablari”ga olib chiqib, harbiy texnikadan foydalanishga, ot sportiga o‘rgatish, ular uchun yakka kurash, futbol, suzish, tennis, shaxmat kabi sport to‘garaklarini tashkil etish;
mehribonlik uylariga biriktirilgan harbiy xizmatchi va xodimlarni bolalar bilan ishlashga o‘qitish;
bolalarga tarbiya berish, ularni xorijiy tillar, kasb-hunar va tadbirkorlikka o‘qitish, sportning nufuzli turlari bilan shug‘ullanishlarini tashkil etish bo‘yicha mutlaqo yangi metodikalarni ishlab chiqish;
buyuk ajdodlarimizni maʼnaviy meroslarini o‘rganish va ichki turizmni keng jalb etish maqsadida Buxoro, Samarqand, Xiva, Shahrisabz, Qo‘qon, Termiz kabi qadimiy shaharlarga sayohatlar tashkillashtirish;
ushbu bolalar orasidan kelgusida “Temurbeklar maktablari”ga, Jamoat xavfsizligi universitetiga o‘qishga qabul qilinishini yo‘lga qo‘yish;
hokimliklar bilan birga 14 yoshdan yuqori o‘g‘il-qizlarni, eng talab yuqori kasblarga o‘rgatishni yo‘lga qo‘yish;
vasiylik, homiylik va patronatga olingan bolalar ahvoli, ularning oilaviy sharoitidan haftalik xabar oladigan tizim yaratish;
“Mehribonlik uylari” tarbiyalanuvchilari bilan ishlashning yangi tizimini joriy etish orqali ularni Vatanimizning chinakam posbonlari etib yetishib chiqishlari uchun barcha kuch imkoniyatlarni safarbar etish, asosiy vazifalardan biri etib belgilab olinganligi taʼkidlandi.
Milliy gvardiya qo‘mondoni o‘z maʼruzasi yakunida Muhtaram Prezidentimiz tomonidan qo‘yilgan vazifalarni hamkor tashkilot va idoralar bilan birgalikda yuqori saviyada bajarilishiga, mehrga muhtoj bolalarni jamiyatda munosib o‘rin egallashlari hamda ularning vatanparvarlik ruhida kamol topishlariga ishonch bildirdi.
