САНКТ-ПЕТЕРБУРГДА ФУТБОЛ БЎЙИЧА БЎЛИБ ЎТГАН ХАЛҚАРО ТУРНИРДА 22-СОНЛИ МЕҲРИБОНЛИК УЙИ ТАРБИЯЛАНУВЧИЛАРИ ҒОЛИБ БЎЛИШДИ
Россия Федерациясининг Санкт-Петербург шаҳрида 2023 йилнинг 7-13 ноябрь кунлари етим ва ота-она қарамоғидан маҳрум бўлган болалар ўртасида BRICS+ мамлакатларининг V-халқаро муниципал Форуми доирасида спорт-маданий Конгресси бўлиб ўтди.
Мазкур конгресс “Добродушные” болаларга ёрдам кўрсатиш хайрия фонди томонидан ташкил этилди. Унда 11-12 ёшли болалардан ташкил топган 6 та давлат ( Бразилия, Россия, Ҳиндистон, Хитой, Жанубий Африка ва Ўзбекистон)дан 12 та жамоа орасида Тошкент шаҳрида жойлашган 22-сонли Меҳрибонлик уйи тарбияланувчиларидан иборат Ўзбекистон терма жамоаси ҳам иштирок этиб, юртимиз шарафини муносиб ҳимоя қилишди.
Иқтидорли ёш футболчиларимиз мусобақанинг гуруҳ босқичи 1-турида Санкт-Петербург жамоасидан 8:0, 2-турида эса Воркута жамоасидан 13:0, Чорак финалда жамоамиз Назия жамоасидан 15:1 ҳисобида устун келиб, мусобақанинг ярим финал ўйинига мардонавор йўл олишди.
Ярим финал босқичида эса Ўзбекистон терма жамоаси Минск жамоасини 8:0 ҳисобида мағлуб этди. Болажонлар шу тариқа турнирнинг финалига мағлубиятсиз, фақат ғалаба билан етиб боришди.
Финалда Мариупол жамоасини 5:3 ҳисобида мағлуб этган юртимиз фарзандлари мусобақа ғолиби бўлиб, фахрли 1-ўринни эгалладилар.
Ғолибликни қўлга киритган 22-сонли Меҳрибонлик уйи тарбияланувчилари кеча пойтахтимиздаги Халқаро аэропортда Миллий гвардия қўмондонлиги, Мактабгача ва мактаб таълим вазирлиги ва бир қатор идоралар вакиллари ва Меҳрибонлик уйи мутасаддилари томонидан ҳарбий оркестр садолари остида тантанали кутиб олинди.
Эслатиб ўтамиз, 2022 йил Россия Федерациясининг Санкт-Петербург шаҳрида 4-Халқаро мусобақасида (2010-2011 йиллар ўртасида) 1-ўрин, 2023 йил август ойида Польшада бўлиб ўтган Меҳрибонлик уйлари тарбияланувчилари ўртасидаги футбол бўйича VIII-Жаҳон чемпионатида 22-сонли Меҳрибонлик уйи тарбияланувчилари фахрли 2-ўринни қўлга киритишган эди.
