Harbiy qismda "Ochiq eshiklar kuni" tadbiri tashkil etildi.
Mamlakatimiz yoshlarini vatanparvarlik, yuksak maʼnaviy-axloqiy qadriyatlar ruhida tarbiyalash, ularning ongiga tinchlik va totuvlikni koʻz qorachigʻidek asrab-avaylash zarurligini chuqur singdirish, yoshlar bilan ishlash, ularning muammolarini tinglash va boʻsh vaqtlarini mazmunli oʻtkazish maqsadida turli uchrashuv va tadbirlar tashkil etilmoqda.
Oʻzbekiston Respublikasi Prezidentining 2022 yil 19 yanvardagi “Mahallalarda yoshlar bilan ishlash tizimini tubdan takomillashtirish chora-tadbirlari toʻgʻrisida”gi PQ-92 son qaroriga asosan mamlakatimizda yoshlarni jismonan sogʻlom, maʼnaviy yetuk insonlar etib tarbiyalash, ilmiy va ijodiy salohiyatini roʻyobga chiqarishga koʻmaklashish, huquqlari, erkinliklari va qonuniy manfaatlarini samarali himoya qilish borasida tizimli ishlar amalga oshirib kelinmoqda.
Shu oʻrinda, Milliy gvardiya tizimida ham yoshlar bilan ishlash yoʻnalishida keng qamrovli ishlar amalga oshirilmoqda.
Ana shunday ishlarning amaldagi koʻrinishi sifatida harbiy qismlarda oʻtkazilayotgan ochiq eshiklar kuni tadbirlarini misol qilib olishimiz mumkin. Milliy gvardiyaning harbiy qismlaridan birida oʻtkazilgan ushbu tadbirlarning birida huquqni muhofaza qiluvchi organ xodimlariga biriktirilgan uyushmagan yoshlar va ogʻir toifadagi yoshlar bilan Ochiq eshiklar kuni doirasida harbiy qismga sayohat uyushtirildi. Unda yoshlar Milliy gvardiya harbiy qismiga tashrif buyurib, ularning xizmat faoliyati va gvardiyachilarga yaratilgan shart sharoitlar bilan tanishtirildi. Shuningdek yoshlar ishtirokida har xil musobaqalar tashkil qilindi. Zamonaviy armiyamizning kuch-qudrati haqida soʻzlab berildi. Harbiy xizmatchilar ishtirokida qoʻl jangi va qurol bilan bajariladigan saf amallari namoyish etildi.
