Bolalarga sog‘ligini asrash yoshlikdan o‘rgatiladi
Qashqadaryo viloyatida oilaviy bolalar uylari farzandlari chuqurlashtirilgan tibbiy tekshiruvdan o‘tkazilmoqda.
Milliy gvardiya Qashqadaryo viloyati bo‘yicha boshqarmasi va “Qo‘riqlash” boshqarmasi harbiy xizmatchi va xodimlari viloyat sog‘liqni saqlash boshqarmasi bilan birgalikda oilaviy bolalar uylari farzandlari uchun chuqurlashtirilgan tibbiy tekshiruv tashkil qildi.
Tibbiy tekshiruv o‘tkazishga terapevt, xirurg, pediatr, oftalmolog, LOR, travmatolog (ortoped), nevropatolog hamda stomatologiya sohasida faoliyat olib borayotgan malakali vrachlar jalb qilindi. Bugungi kunga qadar 37 nafar o‘g‘il va qizlar tibbiy tekshiruvdan o‘tkazildi. Tekshiruv natijalariga ko‘ra, kasallik aniqlangan bolalarga davolanish belgilandi.
Undan tashqari, tekshiruv davomida bolalar va ularning ota-onalariga sog‘lom hayot tarzi to‘g‘risida maslahatlar berildi. O‘g‘il va qizlarga “sog‘liqni yoshlikdanoq asrab avaylash” kerakligi haqida hamda tekshiruv natijalariga ko‘ra bolalarga qaysi sport turi bilan shug‘ullanish zarurligi tushuntirildi.
