Buxoroda tutingan ota-onalar uchun o‘quv kurslari oʻz yakuniga yetmoqda
Yetim va ota-ona qaramog‘idan mahrum bo‘lgan bolalarni tarbiyalashning tubdan yangilangan tizimini joriy etish, ularni barkamol avlod sifatida shakllanishi hamda ijtimoiy moslashuvini taʼminlash uchun zarur shart-sharoitlar yaratish bugungi kunda dolzarb vazifalardan biri sanaladi.
Mazkur vazifalar ijrosini taʼminlash, yetim va ota-ona qaramog‘idan mahrum bo‘lgan bolalarni ota-onasi yoki ularning o‘rnini bosuvchi yaqinlariga qaytarish, vasiy yoki homiy tayinlash, farzandlikka berish va shu bilan bir qatorda, farzandlarni kasb-hunarga o’rgatish, ularda zarur hayotiy ko‘nikmalarni shakllantirish hamda yoshlarni jismonan sog‘lom, maʼnaviy yetuk va dunyoqarashi keng qilib tarbiyalash yuzasidan islohotli ishlar amalga oshirilmoqda.
Xususan, O‘zbekiston Respublikasi Jamoat xavfsizligi universiteti Harbiy-vatanparvarlik, maʼnaviy-maʼrifiy tarbiya va yoshlar bilan ijtimoiy ishlash kafedrasi professor-o‘qituvchilari tomonidan joriy yilning 4-18 fevral kunlari Buxoro viloyatida voyaga yetmagan bolalarni vasiylik, homiylik hamda patronatga olgan va olish istagini bildirgan ota-onalarga zarur hayotiy bilimlar berish maqsadida o‘quv-kurslari boʻlib oʻtdi.
O‘quv kurslari davomida professor-o‘qituvchilar tomonidan voyaga yetmagan bolalar bilan ishlashda yangi psixologik metodlardan foydalanish, shuningdek, bolalar o‘rtasida turli ko‘ngilsiz holatlar yuzaga kelishini oldini olish boʻyicha kerakli ko‘rsatma va tavsiyalar berildi.
