BUXORODA “PREZIDENT ARCHASI” TANTANALARI BO‘LIB O‘TDI
Shu kunlarda mamlakatimizning barcha hududlarida, madaniyat va san’at saroylarida Yangi yil bayrami tadbirlari bo’lib o’tmoqda.
Qorbobo va Qorqiz, turli ertak qahramonlari ishtirokidagi tomoshalar yoshlarni vatanparvarlik, do’stlik, fidoyilik, tinchlik va osoyishtalikning qadriga etish kabi ezgu g’oyalarga undamoqda.
Har yili Yangi yil arafasida “Prezident archasi” shodiyonalari o’tkazilishi bolajonlar uchun beg’ubor orzu-umidlar bayramiga aylangan. Ushbu tantanalar davomida Prezidentimiz sovg’alari topshirilishi esa kichkintoylarning quvonchiga quvonch qo’shmoqda.
Bugun, 28 dekabr kuni viloyat musiqali drama teatrida “Prezident archasi” viloyat tadbiriga hududdagi oilaviy bolalar uylarining tarbiyalanuvchilari, chin yetimlar, vasiylik va homiylikka olingan bolalar, xizmat vazifasini bajarish chog’ida vafot etgan huquq-tartibot idoralari xodimlarining farzandlari hamda nogironligi bo’lgan o’g’il-qizlar taklif etildi.
Yurtboshimizning kelajagimiz egalariga ko’rsatayotgan mehr-e’tibor va g’amxo’rliklari hamda yurtimizdagi bolajonlikning yorqin ifodasini o’zida namoyon etgan tadbirda viloyat hokimi Botir Zaripov ishtirok etib, bolajonlarni Yangi yil bilan tabrikladi. O’qishlariga omad tilar ekan, ularni yangi va yuksak marralarni zabt etishga undadi.
Shundan so’ng viloyat hokimi boshchiligida Milliy gvardiya Buxoro viloyati bo‘yicha boshqarmasi boshlig‘i hamda viloyat sektor rahbarlari tomonidan “Prezident sovg‘asi” tantanali tarzda o‘z egalariga topshirildi.
Tantanalar teatrlashgan sahna ko‘rinishlariga ulanib ketdi. Qorbobo, Qorqiz va ertak qahramonlari ishtirokidagi bayram tomoshasi ishtirokchilarga unutilmas lahzalarni in'om etdi.
