PEDAGOGIKA VA BOLALAR TARBIYASI PSIXOLOGIYASI KURSLARIDAN O‘TGAN OILAVIY BOLALAR UYLARI OTA-ONALARIGA SERTIFIKATLAR TOPSHIRILDI
Ota-ona qaramog‘idan mahrum bo‘lgan va yetim bolalarni tarbiyalashning tubdan yangilangan tizimini joriy etish, ularning barkamol avlod sifatida shakllanishi hamda ijtimoiy moslashuvini taʼminlash uchun zarur shart-sharoitlar yaratish, shuningdek, yetim bolalar va ota-ona qaramog‘idan mahrum bo‘lgan bolalarni davlat tomonidan qo‘llab-quvvatlash masalalari bugungi kunimiz oldida turgan dolzarb vazifalardan biri sanaladi.
Vazifalar ijrosini taʼminlash, tarbiyalanuvchilarni ota-onasi yoki ularning o‘rnini bosuvchi shaxslarga qaytarish, vasiy yoki homiy tayinlash, farzandlikka berish va joylashtirishning boshqa shakllarini qo‘llash choralarini ko‘rish va bu bilan mehribonlik uyi tarbiyalanuvchilarini kasb - hunarga o‘rgatish, ularda zarur hayotiy ko‘nikmalarni shakllantirish hamda yoshlarni jismonan sog‘lom, maʼnaviy yetuk va dunyoqarashi keng qilib tarbiyalash maqsadida O‘zbekiston Respublikasi Jamoat xavfsizlik universiteti "Harbiy-vatanparvarlik, maʼnaviy-maʼrifiy tarbiya va yoshlar bilan ijtimoiy ishlash" kafedrasi professor-o‘qituvchilari va Milliy gvardiya Surxondaryo viloyati bo‘yicha boshqarmasi hamkorligida Termiz shahridagi 12-sonli Mehribonlik uyi bolalarini o‘z qaramog‘iga olgan hamda oilaviy bolalar uylari tashkil etish niyatida bo‘lgan oliyjanob ota-onalarga zarur hayotiy bilimlar berilib, navbatdagi sertifikatlar topshirildi.
Shuningdek, professor-o‘qituvchilar tomonidan tarbiyalanuvchilarning yashash sharoitlari, maktabdagi qiziqadigan fanlari, do‘stlar bilan o‘zaro munosabati, kasb tanlash kabi mavzularda suhbatlashildi. Shu bilan birga, tarbiyalanuvchilarning ijtimoiy pedagogik-psixologik holatini o‘rganish maqsadida, maxsus so‘rovnoma olindi. Mazkur so‘rovnomada shuningdek, tarbiyalanuvchilar o‘zlarini kelajakda qanday inson sifatida ko‘rishlari, o‘zlari kabi vaziyatga tushib qolgan bolalarga qanday g‘amxo‘rlik ko‘rsatish mumkinligi haqida fikrlarga javoblar olindi.
