Joriy yil 17 noyabr kuni poytaxtimizda YUNISEF va O‘zbekiston Respublikasi Oliy Majlisi Senati hamkorligida ota-ona qaramog‘idan mahrum bo‘lgan yoki mahrum bo‘lish xavfi ostida bo‘lgan bolalarning hozirgi ahvoli hamda mamlakatimizda bolalarga g‘amxo‘rlik qilish tizimini isloh qilish borasidagi kelgusi rejalar bo‘yicha davra suhbati bo‘lib o‘tdi.

Mazkur tadbir O‘zbekiston Respublikasi Oliy Majlisi Senatining Yoshlar, madaniyat va sport masalalari qo‘mitasi raisi o‘rinbosari D.Tashmuxamedova moderatorligida tashkil etilib,  unda YUNISEFning Yevropa va Markaziy Osiyo bo‘yicha mintaqaviy direktori Afshan Xan, YUNISEFning O‘zbekistondagi vakolatxonasi rahbari M.Mamedzoda, Milliy gvardiya qo‘mondoni R.Djurayev, shuningdek Oliy Majlisning Bola huquqlari bo‘yicha vakili A.Yunusova, SOS O‘zbekiston Bolalar mahallari uyushmasi direktori G.Abidova, Mahalla va oilani qo‘llab-quvvatlash vazirining birinchi o‘rinbosari G.Maʼrupova, Xalq taʼlimi vaziri o‘rinbosari
R. Karimjonov, Respublika bolalar ijtimoiy moslashuvi markazi direktori V.Alimova, hamda Milliy gvardiya va boshqa masʼul tashkilot mutasaddilari ishtirok etdilar.

Tadbir ochiq muloqot tarzida davom etib, so‘z olganlar tomonidan deinstitualizatsiya bo‘yicha oldinga qadam tashlash yo‘llari, jumladan, muvofiqlashtirishni kuchaytirish, huquqiy meʼyoriy bazani mustahkamlash, mutaxassislar salohiyatini oshirish hamda zaif bolalar va oilalarni qo‘llab-quvvatlash uchun hamjamiyatga asoslangan xizmatlarni tashkil etish masalalari  yuzasidan fikrlar bildirildi.

Mavzu doirasida, Milliy gvardiya qo‘mondoni R.Djurayev  yurtboshimizning yetim bolalar va ota-ona qaramog‘idan mahrum bo‘lgan bolalarni davlat tomonidan qo‘llab-quvvatlash tizimini takomillashtirishga qaratilgan  Qaroriga muvofiq, joriy yilning avgust-oktyabr oylarida amalga oshirilgan ishlar va tubdan yangilangan tizimning samarali natijalari bo‘yicha batafsil maʼlumot berdi.

O‘z navbatida, YUNISEF tashkilotining Yevropa va Markaziy Osiyo mamlakatlari bo‘yicha mintaqaviy direktori Afshan Xan - “O‘zbekiston davlatini bolalarni deinstitualizatsiyalash borasida olgan qatʼiy majburiyati uchun qutlab, islohotlarning davomiy va samarali bo‘lishi uchun bolalarni, shu jumladan, nogironligi bo‘lgan va ijtimoiy himoyaga muhtoj boshqa guruhlarni qamrab olgan yirik muassasalarni bosqichma-bosqich yopishni davom ettirish juda muhimligini alohida taʼkidlab o‘tdi.   

Moderator Dilorom Tashmuxamedova O‘zbekistonda deinstitualizatsiya bo‘yicha qatʼiy siyosatni shakllantirishda muvaffaqiyatga erishilganligini mamnuniyat bilan tilga olib, bu boradagi ishlar davlatimiz rahbarining belgilab bergan aniq va maqsadli vazifalari asosida  tizimli ravishda davom ettirilishiga ishonch bildirdi.