MEHRIBONLIK UYI TARBIYALANUVCHILARI O‘RTASIDA "TO‘MARIS MALIKALARI" KO‘RIK-TANLOVI O‘TKAZILDI
Milliy gvardiya tizimiga qarashli taʼlim muassasalari hamda Mehribonlik uyi tarbiyalanuvchilari o‘rtasida bo‘lajak bekajonlarni To‘maris izdoshlariga munosib jasur, mard, vafodor va albatta, milliy qadriyatlarimizni eʼzozlovchi oilaparvar qilib tarbiyalash maqsadida "To‘maris malikalari" ko‘rik tanlovi tashkil etildi.
Mazkur tanlovda ishtirokchilar 3 yo‘nalishda: “Tanishtiruv”, " Milliy raqs va qo‘shiqchilik" hamda "Quvnoq startlar" shartlari bo‘yicha o‘z imkoniyatlarini sinovdan o‘tkazishdi. Barcha shartlar hakamlar hayʼati aʼzolari tomonidan odilona baholanib borildi.
Bellashuv so‘nggida umumiy baholarga ko‘ra faxrli 3- o‘rinni Toshkent viloyati Chirchiq shahri 14-sonli Mehribonlik uyi tarbiyalanuvchisi Esanova Jasmina ko‘lga kiritgan bo‘lsa, poytaxtimizdagi 21-sonli Mehribonlik uyidan Xidoyatova Dilfuza 2-o‘ringa munosib ko‘rildi.
Sheʼrni ifodali o‘qish hamda milliy raqsga tushishda nazokatli harakatlari bilan barchaning olqishiga sazovor bo‘lgan Toshkent viloyati Bo‘ka tumani 15-sonli Mehribonlik uyidan tashrif buyurgan Ergashova Durdona ko‘rik-tanlovning mutlaq g‘olibi deb topildi. Shu bilan bir qatorda, g‘olibamizga "Toshkent zebolari" raqs ansambli badiiy rahbari Zulfiya Uzakova tomonidan bepul raqs sanʼatini o‘rganish uchun yo‘llanma taqdim etildi.
Tadbir so‘nggida g‘olib va faol ishtirokchilarga tashkilotchilar tomonidan diplom va esdalik sovg‘alari topshirildi.
