“Mehr daftari” tizimi yuzasidan amalga oshirilgan chora-tadbirlarga bag‘ishlangan yig‘ilish o‘tkazildi
O‘zbekiston Respublikasi Vazirlar Mahkamasining 2022 yil 17 yanvardagi "Yetim bolalar va ota-ona qaramog‘idan mahrum bo‘lgan bolalarni har tomonlama qo‘llab-quvvatlashga qaratilgan "Mehr daftari" tizimini joriy etish chora-tadbirlari to‘g‘risida"gi qarori ijrosi yuzasidan amalga oshirilayotgan ishlar va kelgusidagi vazifalarga bag‘ishlangan videoselektor shaklidagi yig‘ilish bo‘lib o‘tdi.
Tanqidiy ruhda o‘tgan mazkur yig‘ilishda Milliy gvardiya qo‘mondonligi, Vazirlar Mahkamasining Bolalarni himoya qilish masalalari sho‘basi mudiri D.Ermatov, Xalq taʼlimi vazirligi boshqarma boshlig‘i F.Ahmedov, Bola huquqlari bo‘yicha vakil (Bolalar ombudsmani) Sh.Qulturayev, Moliya vazirligi bo‘lim boshlig‘i F.Sulaymonov hamda Milliy gvardiyaning hududiy boshqarmalari masʼul hodimlari va boshqa mutasaddi tashkilotlar rahbarlari qatnashdi.
Yig‘ilishda "Mehr daftari" tizimini amaliyotga tatbiq etishda yo‘l qo‘yilgan kamchiliklar, ularni bartaraf etish va kelgusida oldini olish chora-tadbirlarini belgilash, tizimning yetim bolalar va ota-ona qaramog‘idan mahrum bo‘lgan bolalarni ijtimoiy himoya qilishdagi ahamiyati, tizimni qo‘llab-quvvatlashga qaratilgan hokimliklar jamg‘armalaridan maqsadli foydalanish va tarbiyalanuvchilarni davlat tomonidan qo‘llab-quvvatlash borasida amalga oshirilayotgan ishlar tahlil qilinib, tanqidiy ko‘rib chiqildi.
