Mehribonlik uyi tarbiyalanuvchilari oʻrtasida oʻtkazilgan “Huquq bilimdoni” Ombudsman viktorinasi gʻoliblari aniqlandi
2025 yil 9 iyun kuni Oliy Majlisning Inson huquqlari bo‘yicha vakili (ombudsman), Ijtimoiy himoya milliy agentligi hamda O‘zbekiston kasaba uyushmalari federatsiyasi tomonidan “Huquq bilimdoni” Ombudsman viktorinasining yakuniy II bosqichi o‘tkazildi.
Insonning huquq va erkinliklarini amalga oshirishda imkoniyatlar tengligini taʼminlash yetim bolalar hamda ota-onasining vasiyligidan mahrum bo‘lgan bolalarning huquqlari, erkinliklari va qonuniy manfaatlarini taʼminlanishining asosiy mezonlaridan biri hisoblanadi.
Ayniqsa, Mehribonlik uyi tarbiyalanuvchi bolalari o‘rtasida huquqiy xabardorlikni oshirish, ularni qonunga hurmat ruhida tarbiyalash hamda ularning daxldorlik tuyg‘usini oshirish muhim ahamiyatga ega.
Jamiyatda Mehribonlik uyi tarbiyalanuvchilari taʼlimiga bo‘lgan eʼtiborni kuchaytirish, ularning huquq sohasiga bo‘lgan qiziqishini hamda bilimlarini oshirishga qaratilgan mazkur loyiha “1-iyun – Xalqaro bolalarni himoya qilish kuni” munosabati bilan joriy yilning may oyida start olgan edi.
2 bosqichdan iborat ushbu Viktorinada Toshkent shahrida joylashgan Mehribonlik uylarining 100 nafarga yaqin tarbiyalanuvchilari qamrab olingan. Xususan, shahrimizdagi 22 va 30-sonli Mehribonlik uylarining o‘zbek va rus tillarida taʼlim oluvchi yuqori sinf o‘quvchilari viktorinaning 1-bosqichida ishtirok etishgan.
Ombudsman viktorinasining yakuniy bosqichida testlardan eng yuqori ball to‘plagan 10 nafar o‘quvchi ishtirok etdi.
Ishtirokchilar belgilangan vaqt ichida berilgan nazariy va hayotiy voqealardan kelib chiqib tuzilgan amaliy savollarga javob berishdi.
Dastlab Viktorinaning final bosqichiga yetib kelgan 6 nafar ishtirokchilarga tashakkurnoma va esdalik sovg‘alari topshirildi.
Shundan so‘ng hakamlar hayʼati aʼzolari tomonidan berilgan ballar asosida aniqlangan g‘oliblar diplom va qimmatbaho sovg‘alar bilan taqdirlanishdi.
Maʼlumot uchun: O‘zbekiston Respublikasi Konstitutsiyasiga muvofiq, davlat va jamiyat yetim bolalarni hamda ota-onasining vasiyligidan mahrum bo‘lgan bolalarni boqish, tarbiyalash, ularning taʼlim olishi, sog‘lom, to‘laqonli va har tomonlama kamol topishi, shuningdek, bolaning huquqlari, erkinliklari va qonuniy manfaatlarini taʼminlash, uning jismoniy, aqliy va madaniy jihatdan to‘laqonli rivojlanishi uchun eng yaxshi shart-sharoitlarni yaratadi.
