Qurbon hayiti ayyomi arafasida Milliy gvardiya vakillari oilaviy bolalar uylaridan xabar olishdi
Anʼanaga muvofiq, Milliy gvardiya Farg‘ona viloyati bo‘yicha boshqarmasi harbiy xizmatchi va xodimlari bayramlar arafasida oilaviy bolalar uylari farzandlari holidan xabar olib, ota-onalar bilan bayramga tayyorgarlik yuzasidan suhbatlashadilar, biror yordam zarur bo‘lsa doimo ko‘makka shay ekanliklarini bildirishadi.
Ana shunday manzillardan biri Farg‘ona tumanida yashovchi Ro‘ziboyevlar oilasi bo‘ldi. Milliy gvardiya Farg‘ona viloyati bo‘yicha boshqarmasi boshlig‘i Sh. Akbarov ushbu xonadon farzandlari va ota-onalari bilan suhbatlashib, bolalarda taʼtil kunlari qanday o‘tayotgani, bayramga tayyorgarlik jarayonlari bilan qiziqdi. Oila farzandlari mehmonlarga kelgusidagi rejalari haqida qisqacha aytib berishdi: maktabni tugatgach kim qaysi oliygohda tahsilni davom ettirmoqchi, katta bo‘lgach qaysi kasbni egallamoqchi. Ota-onalar bo‘lsa, katta farzandlarga qabulga tayyorgarlik ko‘rishda yordam berish, nafaqat bolalarni xursand qilish balki, ularni yangi bilimlar olishlariga, dunyoqarashini kengaytirishga hissa qo‘shuvchi yozgi taʼtil paytidagi tadbirlar va sayohatlarni tashkil etish bo‘yicha rejalari haqida gapirib berishdi.
Xayrlashish chog‘ida Gvardiyachilar bolalarga bayram sovg‘alarini taqdim etishdi.
