Ochiq eshiklar kuni: Farg‘ona viloyatida bolalar Milliy gvardiyaning hududiy boshqarmasida mehmon bo‘ldi
Farg‘ona viloyati Qo‘shtepa tumanida yashovchi oilaviy bolalar uylari aʼzolari va Farg‘ona shahar 6-maktabdagi sinfdoshlari uchun Milliy gvardiya Farg‘ona viloyati bo‘yicha boshqarmasida bolalarni vatanparvarlik ruhida tarbiyalash maqsadida “Ochiq eshiklar kuni” o‘tkazildi.
O‘g‘il-qizlar kutubxonaga tashrif buyurib, Milliy gvardiya harbiy xizmatchilari qanday kitoblarni o‘qishlarini ko‘rdilar, muzeyda Milliy gvardiya tarixiga oid hikoyalarni tinglab, bu yerdagi eksponatlarni qiziqish bilan tomosha qilishdi.
Bolalar harbiy xizmatchilarning ot sporti bilan shug‘ullanishlari va kinologiya xizmati haqidagi maʼlumotlarni zavq bilan tingladilar. Mehmonlarga jangovar va jismoniy tayyorgarlik mashg‘ulotlari qanday olib borilayotgani haqida ham maʼlumotlar berildi va ko‘rsatildi. Ekskursiya o‘quvchilarda katta taassurot qoldirdi.
