Milliy gvardiya harbiy xizmatchilari bilan bir kun
Milliy gvardiya Sirdaryo viloyati bo‘yicha boshqarmasi harbiy xizmatchilari tomonidan Botir va Shoira Jumayevlar hamda Laziz va Rayxon Ahmedovlar oilasi farzandlari uchun qiziqarli tadbirlar tashkil etildi.
Ahmedovlar oilasining olti nafar farzandi, Jumayevlarning yetti nafar farzandi IT park, sport majmuasi va istirohat bog‘iga tashrif buyurishdi. IT park bo‘ylab sayohat davomida bolalarga kutubxona ko‘rsatilib, yo‘l yo‘lakay bu yerda qanday to‘garaklar faoliyat ko‘rsatishi, mashg‘ulotlar qay tarzda olib borilayotgani, olingan bilimlar kelajakda nechog‘lik foydali ekanligi haqida so‘zlab berildi. Shu bilan bir qatorda, bolajonlarni to‘garakdagi mashg‘ulotlarga qiziqtirish, o‘z iqtidorini sinab ko‘rish imkoniyatini yaratish maqsadida to‘garak sardorlari tomonidan bolalar bilan sinov darslari o‘tkazildi.
Sport majmuasida bolalarni suzish bo‘yicha murabbiy kutib olib, qayerda suzish mumkin va qayerda suzmaslik kerakligi, suzishdan oldin nima uchun isinish zarurligi to‘g‘risida tushunchalar berdi.
Kunning ikkinchi yarmida kapitan Jamshidbek Nizomov va kichik serjant Nozima Alimova bolalarni ko‘ngilochar bog‘ga olib bordi va u yerda barcha ishtirokchilar attraksionlarda uzoq vaqt sayr qilishdi.
