Oilaviy bolalar uyi farzandlari tomonidan konsert va qoʻl mehnati mahsulotlari koʻrgazmasi namoyish etildi
Milliy gvardiya Farg‘ona viloyati boʻyicha boshqarmasiga qarashli harbiy qismda "Muqaddas rishtalar" nomli Oilaviy bolalar uyi farzandlari uchun chinakam ijod bayrami tashkil etildi. Tadbir davomida milliy-amaliy san’at, tikuvchilik, musiqa va chizmachilikka qiziqishi baland boʻlgan qizlarga o‘z iste’dod va mahoratini namoyon etish imkoniyati yaratildi. Harbiy qismga tashrif buyurgan mehmonlar va ularning oila a’zolari kashtachilik namunalari hamda milliy kiyim-kechaklardan hayratda qolishdi. Qizlar tomonidan milliy cholg‘u asboblarida ijro etilgan kuy-qo‘shiqlar boʻlsa, tomoshabinlarning olqishiga sazovor boʻldi. Hunarmand qizlar va yosh musiqachilar uchun bugungi kun oʻzgacha boʻldi: bu koʻrgazma ularga muvaffaqiyat va munosib e’tirof olib keldi.
