Poytaxt maktablarida madaniy-ma’rifiy tadbirlar va profilaktik suhbatlar oʻtkazilmoqda
Yunusobod tumanidagi 58-sonli maktabda “Yosh gvardiyachilar” sinfi bilan Oʻzbekiston Respublikasi Davlat bayrogʻi qabul qilingan kun munosabati bilan bayram tadbiri tashkil etildi.
Tadbir davomida maktab maʼmuriyati va Milliy gvardiya inspektor-psixologlari o’quvchilar bilan Davlat bayrogʼi qanday muhim ahamiyatga ega ekanligi, uning mohiyati, undagi belgilar qanday maʼno kasb etishi va bayrog’imizni yuksaklarga koʻtarish har bir fuqaroning burchi ekanligi haqida suhbatlashishdi. Shuningdek, oʻquvchilarga Vatanimiz bayrogʻi haqida tayyorlangan videoroliklar namoyish etildi.
Uchtepa tumanida joylashgan 193-sonli maktabda oʻqituvchilar va o’quvchilar ishtirokida zilzila vaqtida harakat qilish hamda yongʻin xavfsizligini taʼminlash boʻyicha tadbir oʻtkazildi.
O’g’il-qizlar tadbir davomida kuchli zilzila bilan bog‘liq favqulodda vaziyatlardan muhofazalanish, yong‘in xavfsizligi qoidalariga rioya etish bo‘yicha nazariy bilim va amaliy ko‘nikmalarga ega bo‘lishdi.
