Poytaxt maktablarida o’quvchilar bilan bir qator tadbirlar o’tkazildi
Yoshlarning bugungi kundagi qiziqishlari va ularni qiynab kelayotgan muammolarini joyida hal etish bugun dolzarb hisoblanadi. Xususan, Bektemir tumanidagi 337-sonli umumtaʼlim maktabida "Rahbar va yoshlar" uchrashuvi tashkil etildi. Uchrashuvda yoshlar oʻzlarini qiziqtirgan savollariga kerakli javoblar olishdi. Yigʻilish koʻtarinki ruhda boʻlib oʻtdi.
Shayxontohur tumanidagi 192-sonli umumtaʼlim maktabida yoshlar oʻrtasida giyohvandlikning oldini olishga qaratilgan targʻibot-tashviqot tadbir oʻtkazildi. Unda professor-oʻqituvchilar, tuman hokimligi va "Koʻkcha" mahalla masʼullari va ota-onalar ishtirok etdi.
Tadbirda huquqbuzarlik va jinoyatga moyil shaxslar nazoratini kuchaytirish, huquqbuzarlik va jinoyatlarning oldini olish, psixotrop hamda narkotik moddalarni targʻib qiluvchi "narkograffiti" yozuvlarni aniqlash va oʻchirish kabi masalalar boʻyicha mutaxassislar tomonidan muhim koʻrsatmalar berildi. Ochiq muloqot ruhida oʻtgan tadbirda yuqoridagi dolzarb mavzular yuzasidan videoroliklar namoyish etildi.
Mazkur tumanning 314-sonli umumtaʼlim maktabida esa “Yangi Oʻzbekiston maktab ostonasidan boshlanadi” shiori ostida harbiy-vatanparvarlik, sport va maʼnaviy-maʼrifiy tadbirlar uyushtirildi. Toshkent shahar maktabgacha va maktab taʼlimi boshqarmasi bilan hamkorlikda "Maʼnaviyat kuni" tajribasi misolida oʻtgan tadbirlarga tuman hokimligi, Milliy gvardiya, ichki ishlar vakillari, mahalla faollari va ota-onalar taklif etildi. Tadbir doirasida maktab qoshida faoliyat koʻrsatayotgan turli kasb-hunar, fan, sport, sanʼat, kitobxonlik va kompyuter savodxonligi toʻgaraklari aʼzolari oʻz chiqishlarini namoyish etdilar. Maktabning tajribali oʻqituvchilari tomonidan mahorat darslari tashkil qilindi.
Mirzo Ulugʻbek tumanidagi 171-sonli umumtaʼlim maktabida ham oʻquvchilarni vatanparvarlik ruxida tarbiyalash maqsadida Afgʻoniston urushi qatnashchilari faxriy mehmon sifatida taklif qilindi. Tadbirda qiziqarli maʼruzalari va videoroliklari bilan oʻquvchilar qiziqish bilan koʻrib tinglashdi. Tadbir soʻngida oʻquvchilar oʻzlarini qiziqtirgan savollariga javob olishdi.
