«Inson qalbiga yo‘l mehr-muruvvatdan, saxovatdan boshlanadi”!
Respublika Maʼnaviyat va maʼrifat markazi tomonidan Qoraqalpog‘iston Respublikasi, viloyatlar va Toshkent shahrida olimlar, ziyolilar ishtirokida aholi, ayniqsa, yoshlar orasida insoniylik qadriyatlari, mehr-oqibat g‘oyalarini keng targ‘ib qilish maqsadida "Inson qadri" loyihasi amalga oshirilmoqda. Mazkur loyiha davomida mamlakatimizda joylashgan mehribonlik va muruvvat uylari tarbiyalanuvchilari hamda saxovat uylarida istiqomat qilayotgan nuroniylar uchun madaniy, maʼnaviy-maʼrifiy tadbir o‘tkazish, ularning ko‘nglini ko‘tarish maqsad qilindi.
Loyiha doirasida poytaxtimizdagi 22-sonli mehribonlik uyida “Mehr-saxovat” aksiyasi tashkil etildi. "Inson qalbiga yo‘l mehr-muruvvatdan, saxovatdan boshlanadi" deb nomlangan tadbirda bir guruh “Maʼrifat” targ‘ibotchilari jamiyati aʼzolari, madaniyat, adabiyot va sanʼat namoyondalari hamda mehribonlik uyi tarbiyalanuvchilari ishtirok etdi.
Tadbirda so‘zga chiqqanlar mehr-oqibat, muruvvat tushunchalari asrlar mobaynida el-yurtimizning dunyoqarashi, maʼnaviy hayotining negizi sifatida vujudga kelganini, ongimizdan chuqur joy olgan buyuk qadriyatlarning amaliy ifodasi ekanligini taʼkidlab o‘tishdi.
Shu bilan bir qatorda, aksiya doirasida tarbiyalanuvchilarga hayotda kerak bo‘ladigan kasb-hunarlarni o‘rgatish ham ko‘zda tutilgan bo‘lib, tadbir davomida tajribali mutaxassislar sartaroshlik kasbiga qiziqishi yuqori bo‘lgan yoshlarga kasb sirlarini belgilangan tartibda o‘rgatilishiga kelishib. Shuningdek, to‘quvchilik, qandolatchilik yo‘nalishlarida ham guruhlar shakllantirildi.
Shuningdek, Oila va bolalar psixologi Shoira Isakova yosh o‘g‘il-qizlar bilan samimiy suhbatlashib, psixologik trening o‘tkazdi. Trening davomida bolalar hayotda o‘z o‘rnini topishlarida eʼtibor qaratish lozim bo‘lgan jihatlar, iqtidorini yuzaga chiqarishda atrofdagi insonlarning o‘rni haqida to‘xtalib o‘tib, ishtirokchilarni qiziqtirgan savollariga javob berdi.
Shu bilan bir qatorda, “Maʼrifat” targ‘ibotchilar jamiyati aʼzolari , taniqli xonandalar ijrosidagi kuy-qo‘shiqlar, mashhur asarlardan parchalar bolalarning quvonchiga sabab bo‘ldi.
