Bolalar – kelajagimiz, ularni ham jismonan, ham ruhan, ham maʼnan sog‘lom bo‘lib kamolga yetkazish barchamizning asosiy vazifamizdir. Mamlakatning ertangi kuni, tinch va obod bo‘lishi eng oldin mana shu kichik jamiyatda o‘sib-unayotgan bolalarimizga bog‘liq.

Joriy yilning 28 iyul kuni Nogironligi bo‘lgan, ota-ona qaramog‘idan mahrum va yetim bolalarni davlat tomonidan qo‘llab-quvvatlashni kengaytirish bo‘yicha videoselektor yig‘ilishi o‘tkazildi. Bunda davlatimiz rahbari Mehribonlik uylaridagi bolalarni oilaga yaqin muhitda tarbiyalash, bilim va maʼnaviyatli, vatanparvar insonlar etib voyaga yetkazish zarurligini taʼkidladi.

Shu maqsadda bu borada yangi tizim joriy qilinishi belgilandi. Unga ko‘ra, 16 ta Mehribonlik uyi va 4 ta Bolalar shaharchalaridagi yoshlarning taʼlim-tarbiyasiga O‘zbekiston Respublikasi Milliy gvardiyasi masʼul etib belgilandi. Bundan masuʼliyatli vazifani o‘z zimmasiga olgan holda Respublika bo‘ylab barcha mehribonlik uylari, bolalar shaharchalari harbiy xizmatchilar tomonidan o‘rganilib, tizimli ishlar yo‘lga qo‘yildi. Xususan, har bir bola uchun psixolog harbiy xizmatchilar masʼul etib belgilandi. Shu bilan bir qatorda Mehribonlik uylaridagi bolalarni oilaga yaqin muhitda tarbiyalash, bilim va maʼnaviyatli vatanparvar insonlar etib voyaga yetkazishga alohida eʼtibor qaratildi.

O‘zbek xalqi — bolajon xalq deb bejizga aytishmaydi. O‘zbekistonda azaldan oila va bola qadri juda baland. Ushbu maqol ikkinchi jahon urushi yillarida ham o‘zining amaliy tasdig‘ini topgan edi. O‘zbek xalqi 300 mingdan ortiq qarovsiz qolgan bolalarni o‘zining issiq bag‘riga olib, qaxramonlik qilgani xozirga qadar yosh avlodga namuna sifatida qarab kelinmoqda. Yuqorida ishlab chiqilgan qarorlarga asosan ota-onasidan qarovsiz qolgan bolalarning huquq va manfaatlari himoya qilinishini taʼminlash, ular uchun oilaviy sharoitlarga yaqinlashtirilgan zarur sharoitlar yaratish maqsadida Milliy gvardiya boshqarmasi tomonidan "Oilaviy bolalar uyi" tashkil etish istagida bo‘lgan fuqarolar qabul qilinib, ularga qisqa muddatlarda barcha zarur shart-sharoitlar yaratib berildi. Maʼlumot o‘rnida, Oilaviy bolalar uyi ota-onasining qarovisiz qolgan bolalar uchun tarbiya muassasasi hisoblanadi.

Ota-onasining qarovisiz qolgan bolalarni tarbiyalash, o‘qitish, sog‘lomlashtirish, aqliy, psixologik va jismoniy rivojlantirish, ularni ijtimoiy moslashtirish va muhofaza qilish uchun qulay shart-sharoitlar yaratish, ular uchun oiladagiga yaqin zarur sharoitlar vujudga keltirish oilaviy bolalar uyining asosiy vazifalari hisoblanadi. Vasiylik va homiylik organlari oilaviy bolalar uylari tashkil etishga ko‘maklashadilar, tarbiyalovchi ota-onalarga zarur tashkiliy yordam ko‘rsatadilar hamda har oyda kamida bir marta tarbiyalanuvchi bolalar turmushi va tarbiyalanishi sharoitlarini kuzatib boradilar.

Shuni taʼkidlash joizki bugun Sirdaryo viloyatida 1ta Mirzaobod tumanida, 7ta Guliston shahrida jami 8ta oilaviy bolalar uyi tashkil etildi. Xususan, Boltayevlar, Jumayevlar, Gadoyevlar, Ahmedovlar, Ahmadxonovlar, Jiyanboyevlar, Shavqiyevlar hamda TURSUNOVLAR oilalari bugungi kunning chinakam qahramonlari deya baralla aytish mumkin. Mazkur oilalar 41nafar tarbiyalanuvchilarni asrab olib insonparvarlikning yuksak namunasini ko‘rsatishdi. Shuning bilan birga 2 nafar tarbiyalanuvchilar potronat tariqasida hamda 11 nafar bolajonlar esa o‘z oilalariga tarqatildi.

Baxtli oila deganda bevosita ota-ona hamda ko‘zlari quvonchga to‘la bolajonlar ko‘z oldimizga keladi. Bugungi kunda barcha bolajonlarning kemtik qalblari ana shunday chinakam baxtga to‘ldi. Endi ularning ham boshqa bolalar singari sevib, ardoqlaydigan ota-onalari bor!