Миллий гвардия Меҳрибонлик уйи болалар муассасалари бошқармаси томонидан Ўзбекистон Республикаси Президентининг 2022 йил 4 августдаги “Оилавий болалар уйлари фаолиятини такомиллаштиришга доир қўшимча чора-тадбирлар тўғрисида”ги 345-сонли ва Вазирлар Маҳкамасининг 2022 йил 16 августдаги “Оилавий болалар уйлари тўғрисидаги низомни тасдиқлаш ҳақида”ги 451-сонли қарорларининг мазмун-моҳиятини Оилавий болалар уйларини ташкил этган фуқароларга етказиш мақсадида семинар ўтказилди.
Видео-конференц-алоқа форматида ўтказилган мазкур семинарда Қорақалпоғистон Республикаси, Тошкент шаҳри ва бошқа вилоятлардан ота-оналар ҳамда фарзандлари иштирок этди.

Мазкур ҳужжатларда белгиланган қоидаларга ойдинлик киритиш ҳамда ота-оналарнинг саволларига батафсил жавоб бериш учун тадбирга Вазирлар Маҳкамаси Болаларни ҳимоя қилиш сектори етакчи мутахассиси Сухроб Холиқов, Халқ таълими вазирлиги бош мутахассиси Ўрол Худайбердиев, Молия вазирлиги бошқармаси бошлиғи Фаррух Зокиров, Тошкент шаҳар ҳокимияти Болаларни ҳимоя қилиш сектори бош мутахассиси Санжар Жабборов таклиф этилди.
Йиғилиш Миллий гвардия Меҳрибонлик уйи болалар муассасалари билан ишлаш бошқармаси бошлиғи, полковник Алишер Пирматов томонидан олиб борилди.

Семинар иштирокчиларига Оилавий болалар уйлари фаолиятини йўлга қўйиш учун юридик шахс мақомини ташкил этиш зарурати бартараф этилганлиги боис, Оилавий болалар уйини очиш борасидаги талаблар соддалаштирилганлиги тушунтирилди. Биринчидан, Оилавий болалар уйини очиш учун тақдим қилинадиган аризага илова қилинадиган ҳужжатлар рўйхати қисқартирилди. Эндиликда номзодлар аризага фақат тиббий муассасанинг тиббий-маслаҳат комиссиясининг номзодлар саломатлиги тўғрисида хулосасини ҳамда номзодлар томонидан ҳомийлик остидаги ота-оналарнинг малакасини ошириш курсларини тамомлаганлиги тўғрисидаги гувоҳномани илова қилиши керак. Иккинчидан, янги ҳужжатлар (ПҚ-345-моддаси 1-банди 3-қисм) ваколатли орган ягона дарча базасидан олиши мумкин бўлган маълумотномалар номзодлардан таълаб қилиш бекор бўлди. Булар: никоҳ тўғрисидаги гувоҳнома; иш жойи, эгаллаб турган лавозими ва иш ҳақи (агар мавжуд бўлса) ёки бошқа даромад манбалари тўғрисидаги маълумотлар; психиатрия, тери-таносил, наркологик ва силга қарши диспансерларнинг хулосалари; судланганлиги тўғрисидаги маълумотлар (судланмаганлиги); турар-жойга эгалик ҳуқуқини ёки турар жойдан фойдаланиш ҳуқуқини тасдиқловчи ҳужжат. Яъни номзодлар тегишли вазирлик ва идоралардан ушбу маълумотномаларни олиш учун вақт ва маблағ сарфлашлари шарт эмас.
Шунингдек, ота-оналарнинг Оилавий болалар уйларида фарзандларни тарбиялаш давридаги стажни ҳисоблаш бўйича фикр ва таклифлари тингланди. Масъул мутахассислар томонидан семинарда кўтарилган масалалар эътибордан четда қолмаслиги, билдирилган таклифлар тегишли вазирлик ва идораларда кўриб чиқиш учун киритилиши ҳақида маълумот берилди.
Жорий йилнинг 4 августига қадар Оилавий болалар уйлари ташкил этган ота-оналарга Президент қарорида белгиланган тарбияланувчилар сони бўйича бўлган чеклов уларга нисбатан татбиқ этилмаслиги тушунтирилди.
Шу билан бир қаторда, банк пластик картасини очиш ва болаларни боқиш харажатлари учун ажратиладиган маблағларни ҳисобга олиш тартибига аниқлик киритилди. Ота-оналарнинг маблағларни ўтказиш санаси бўйича истаклари инобатга олинди.
Оилавий болалар уйи фарзандлари ва ногиронлиги бўлган болаларга олий таълим муассасаларига, жумладан, ҳарбий олий ўқув юртларига ўқишга киришда бериладиган имтиёзлар ҳақидаги саволларга атрофлича жавоблар берилди.
Оилавий болалар уйлари тарбияланувчилари, шунингдек, ота-оналарнинг ўз фарзандларига бериладиган имтиёзлар: Давлат спорт мажмуалари, маънавий-маърифий муассасалар, тўгараклар, от спорти сексиялари, “Ишга марҳамат” мономарказларига бепул кириш, бепул саёҳатлар ташкил этиш, мамлакатимизнинг тарихий обидаларига саёҳат, соғломлаштириш оромгоҳларига йўлланмалар ажратиш, шунингдек, тўлиқ тиббий кўрикдан ўтказиш бўйича тушунчалар берилди.
Ҳар бир ота-онанинг мурожаати масъул раҳбарлар томонидан назоратга олиниб, айрим масалалар юзасидан мутасадди ташкилотларга тегишли топшириқлар берилди.