Раҳимжон ота қайта-қайта ҳеч қачон уруш бўлмасин деб такрорлайди
Атаевлар оиласининг фарзандлари Иккинчи жаҳон уруши қатнашчиси Раҳимжон ота Ражапов хонадонига ташриф буюрди. Раҳимжон Сотвордиевичнинг айтишича, у 1924 йил 8 август куни Тошкентда туғилган. Уруш бошланганида у ҳатто 17 ёшга тўлмаган бўлиб, ҳарбий хизматга чақирилган. Раҳимжон ота Украина, Москва, Воронеж, Минск, Ленинград фронтларида жанг қилиб, Беларусда бўлган урушнинг бирида яраланган. Касалхонада даволанганидан сўнг, у “Авто-мото-ўқчи” полкида хизматни давом эттирган. 1945 йилда у ғалаба билан эсон-омон уйига қайтган. Раҳимжон ота 5 нафар ўғил, 2 нафар қизни вояга етказган бўлиб, бугунги кунда 16 нафар невара ва 20 дан ортиқ эваранинг бахтиёр бобосидир. "Ҳар сафар дуога қўл очганимда, қайта-қайта такрорлайман: ҳеч қачон уруш бўлмасин!",- деб уруш фахрийси ҳикоясини тугатди.
Болажонлар ҳам ўз навбатида Раҳимжон ота билан ўз ҳаётларини ўртоқлашди.
Уларнинг ота-оналари-Нурулла Убайдуллаевич ва Камила Муратовна ҳамиша катта оилани орзу қилган. Мамлакатимизда болалар таълим муассасаларидан фарзандларни тарбиялаш имконияти мавжудлигини билиб, эр-хотин Оилавий болалар уйини ташкил қилишда ёрдам беришларини сўраб ариза ёзган ва бугунги кунда улар 9 (никоҳда туғилганлар билан биргаликда) 6 ўғил ва 3 қизнинг бахтли ота – оналари.
Раҳимхон ота оиласига эга бўлган ўғил-қизлар учун қувониб, меҳр-муҳаббат халқимизга хос туйғу эканлигини таъкидлади.
Этироф этиш жоизки, уруш йилларида Собиқ Совет Иттифоқи республикаларидан минглаб болалар Ўзбекистонга эвакуация қилинганида, бекатларда оилалар болаларни меҳр билан кутиб олишган.
