1-iyun - "Xalqaro bolalarni himoya qilish kuni" munosabati bilan bayram tadbiri tashkil etildi
Xalqaro bolalarni himoya qilish kuni butun dunyo bolalari uchun eng beg‘ubor va quvonchli bayram hisoblanadi. Albatta, bola bu dunyo, bu hayot mazmunining ajralmas qismidir. 1-iyun - yaʼni, yozning ilk kuni dunyoning deyarli barcha mamlakatlarida va bizning yurtimizda ham keng miqyosda bayram sifatida nishonlanadi.
Ana shunday tadbirlardan biri Milliy gvardiya Farg‘ona viloyati bo‘yicha boshqarmasida ham harbiy xizmatchilar farzandlari uchun ko‘tarinki ruhda o‘tkazildi. Tadbirni boshqarma boshlig‘i "O‘zbekiston-bolajon yurt, xalqimiz azal-azaldan bolajon xalq ekanligi va bolalar bizning quvonchimiz, ishonchimiz" degan so‘zlari bilan boshlab, tashrif buyurgan mehmonlar hamda bolajonlarni bayram bilan samimiy tabrikladi. Shundan so‘ng, barcha jajji mehmonlarga bolajonlar uchun atalgan sovg‘alar ulashildi.
Bolajonlarni ko‘zlarida tabassum uyg‘otish va ko‘tarinki kayfiyat ulashish maqsadida tadbirning badiiy qismida Farg‘ona shahar Madaniyat markazidan tashrif buyurgan bolalar va sanʼat vakillari tomonidan ajoyib bayram kechasi bo‘lib o‘tdi. Kuy-qo‘shiq va raqslar ijrosi tomosha qilindi. Bayram tadbiri o‘zgacha shukuh va kayfiyatda o‘tkazildi, muhimi, qalblarida faqat musaffolik ufurib turgan bolalarimiz yana-da zavqqa to‘lib, madaniy ozuqa oldi.
