24 nafar o‘g‘il-qizlarga imtiyoz asosida oliy taʼlimga o‘qishga qabul qilinganliklari bo‘yicha talabalik guvohnomalari topshirildi
Davlatimiz rahbarining 2021 yil 9 avgustdagi qarori asosida oliy taʼlim muassasalariga talabalarni qabul qilishning umumiy sonidan Mehribonlik muassasalari bitiruvchilari uchun qo‘shimcha ravishda bir foizgacha davlat granti asosida qabul kvotalari SOS – bolalar mahallalari, Oilaviy bolalar uylari farzandlari, shuningdek, vasiylikka, homiylikka olingan bolalar uchun ham tadbiq qilina boshladi.
Maʼlumot uchun: ushbu qo‘shimcha kvotalarning oliy taʼlim muassasalari bo‘yicha taqsimoti Xalq taʼlimi vazirligi va Milliy gvardiya tomonidan belgilanib, 2021/2022 o‘quv yilida jami 267 nafar,2022/2023 yilda bo‘lsa, jami 790 nafar yetim va ota-ona qaramog‘idan mahrum bo‘lgan bolalar o‘qishga qabul qilindi. Shundan 24 nafari (ulardan 16 nafari vasiylikdagi, 5 nafari Mehribonlik uyining bitiruvchilari va 3 nafari Oilaviy bolalar uylarining farzandlari) Jizzax viloyati yoshlarini tashkil etadi.
Kuni kecha Milliy gvardiya Jizzax viloyati bo‘yicha “Qo‘riqlash” boshqarmasida yoshlarga oliy taʼlim muassasalariga o‘qishga qabul qilinganliklari bo‘yicha talabalik guvohnomasini tantanali topshirish marosimi bo‘lib o‘tdi.
Unda O‘zbekiston Respublikasi Milliy gvardiyasi qo‘mondoni o‘rinbosari, polkovnik S.Mamayusupov, Jizzax Davlat pedagogika universiteti o‘quv ishlari prorektori Botir To‘xtamishov, Jizzax viloyati hokimligi Bolalarni himoya qilish kotibiyati mudiri Nargiza Mavlonova, viloyat Xalq taʼlimi Bolalarni ijtimoiy himoyalash va qo‘llab-quvvatlash boshqarmasi bosh mutaxassisi Elbek Usmonov, Oila va xotin qizlar boshqarmasi boshlig‘i o‘rinbosari Gulnora Ikromova va Milliy gvardiya Jizzax viloyati bo‘yicha boshqarmasi harbiy xizmatchilari hamda yoshlar ishtirok etdi. Tadbirda so‘z olganlar, bugungi murakkab globallashuv davrda jamiyatimizda milliy g‘oya va mafkuraviy immunitetni kuchaytirish, yoshlarimizni turli zararli g‘oya va tahdidlardan asrash, ularni o‘z mustaqil fikriga ega, irodali, fidoyi va vatanparvar insonlar etib tarbiyalash har qachongidan ham dolzarb ahamiyat kasb etayotganligini taʼkidlab, yoshlarga ko‘proq til o‘rganish hamda axborot texnologiyalari sohasida yangiliklardan xabardor bo‘lish kerakligini tavsiya etdi.
Shundan so‘ng, ularga tantanali ravishda talabalik guvohnomalari, Milliy gvardiya qo‘mondonligi tashakkurnomasi hamda badiiy kitoblar topshirildi.
