Hasanboy Do‘smatov o‘zi tug‘ilib o‘sgan Andijon shahridagi oila xonadoniga tashrif buyurdi.
Olimpiya o‘yinlari chempioni, Jahon chempionati hamda Osiyo o‘yinlari kumush medali sovrindori, ikki karra Osiyo chempioni va Universiada g‘olibi Hasanboy Do‘smatovning tashrifi Farhod Fozilovich va Dildora Abdurashidovnaning o‘n nafar farzandi uchun kutilmagan voqea bo‘ldi.
O‘g‘il bolalar - 17 yoshli Temur va 16 yoshli Tursunboy Milliy gvardiya vakili, faxriy sportchimizning maktabda qanday o‘qiganligi, boksga kirib kelish tarixi, ringga chiqqanida qanday his-tuyg‘ularni boshdan kechirgani bilan qiziqishdi.
O‘tgan yilning oktabr oyida faoliyati yo‘lga qo‘yilgan mazkur Oilaviy bolalar uyi farzandlarining hayotida sportning o‘rni katta: yetti yoshli Bahora va qolgan bolalar ham sportga ishtiyoqmand. Qolaversa, Farhod Fozilovich va Dildora Abdurashidovnaning uch nafar farzandi Andijon bolalar shaharchasining yetti nafar sobiq tarbiyalanuvchilari xonadonlariga tashrif buyurishganidan xursand bo‘lishdi: ular bilan birga o‘ynaydigan, sport bilan shug‘ullanadigan sheriklar topilgan edi.
To‘ng‘ich farzand, 22 yoshli Begoyim Andijon tibbiyot institutida tahsil olmoqda. Shuningdek, bo‘lg‘usi shifokor sifatida aka-uka va opa-singillarini jismoniy tarbiya va sportga qiziqtirib kelmoqda.
