Baxtli oila – sog‘lom jamiyat asosidir
Aziza Rayimova hamda uning singillari yoshlik yillarini Buxoro shahridagi 32-sonli Mehribonlik uyida o‘tkazdi. O‘zbekiston Respublikasi Prezidentining "Yetim bolalar va ota-ona qaramog‘idan mahrum bo‘lgan bolalarni tarbiyalashning tubdan yangilangan tizimini joriy etish chora-tadbirlari to‘g‘risida"gi Qaroridan so‘ng, uning yillar davomida ushalmagan orzusi ro‘yobga chiqdi, endilikda u o‘z ota-onasiga ega bo‘lish baxtiga muyassar bo‘ldi. Ochilovlar oilasida u yaxshi taʼlim-tarbiya olib, davlatimizning yuksak eʼtiborini doimo his qilib yashadi va kelgusida Vatanimiz rivoji yo‘lida o‘z hissasini qo‘shish harakatida.
Azizaning yana bir orzusi esa, barcha qizlar kabi oq libosda baxt ostonasi sari qadam tashlash edi. Kuni kecha Buxoro viloyati hokimligi hamda Milliy gvardiya Buxoro viloyati bo‘yicha boshqarmasi masʼullari boshchiligida Azizaning nikoh to‘yi tantanali ravishda o‘tkazildi.
Tadbirda so‘z olganlar ularga baxt-saodat, uzoq umr, sihat-salomatlik tiladi.
Tadbirga mehmon sifatida tashrif buyurgan Buxoro viloyat hokimi o‘rinbosari-oila va xotin-qizlar boshqarmasi boshlig‘i Feruza Ibragimova yosh kelin-kuyovlarga o‘zining ezgu va samimiy tilaklarini bildirdi.
Mazkur marosimga viloyatdagi barcha Oilaviy bolalar uyi rahbarlari hamda sobiq Mehribonlik uyi direktorining tashrif buyurganligi, ularning bir-biriga bo‘lgan hurmat-izzati ularning ahilligidan dalolat beradi, albatta.
