Bahorni xushkayfiyat ila qarshi olamiz
Samarqand viloyati Paxtachi tumanida istiqomat qiluvchi Toʻxtamurodovlar oilasida sumalak sayli tashkil etildi. Oila davrasida boʻlib oʻtgan tadbirda oila farzandlari ham sumalak tayyorlash jarayoniga bevosita oʻz hissalarini qoʻshishdi.
-Sumalak tayyorlash aslida mashaqqatli mehnat ekanligini his etdik deydi, bolajonlar. Biz doim tayyor va shirin taomni maroq bilan isteʼmol qilar edik. Mana bugun ota-onalarimiz milliy taomlarimizdan hisoblangan sumalakning kelib chiqish tarixini soʻzlab berishdi. Shu bilan birga, uni tayyorlashning sir-asrorlarini ham oʻrgatishdi.
Shundan soʻng, doshqozon atrofida oila aʼzolari tomonidan samimiy suhbat qurilib, kuy-qoʻshiqlar kuylandi. Insonlarni birdamlik, ahillikka chorlovchi sumalak sayli bolajonlar uchun bir umrga esda qolarli xotiralarga boy boʻldi.
