Bayram arafasida bolajonlardan xabar olinib, sovg‘alar o‘z egalariga topshirildi
Yangi yil- bolajonlar sabrsizlik bilan kutadigan eng ajoyib oilaviy bayram hisoblanadi. Bolalar uchun yangi yilning kelishi haqiqiy mo‘'jiza va ertakdir. O‘rni kelsa yangi yil bayramini intiqlik va ulkan quvonch bilan kutayotgan bolajonlarning zavqiga sherik bo‘lib, kattalar ham bayram arafasida mo‘'jiza kuta boshlaydi. Shu kunlarda respublikamiz bo‘ylab ko‘plab qorako‘zlar sehrli bayramni va albatta, o‘zlari yil davomida orzu qilib, qorboboga yo‘llagan maktubidagi sovg‘ani intiqlik bilan kutishmoqda.
Bayram arafasida bolajonlarga xushkayfiyat ulashib, ularni yaqinlashib kelayotgan Yangi yil bilan tabriklash maqsadida Milliy gvardiya Buxoro viloyati Chavandozlar maktabi rahbariyati Peshku tumanida istiqomat qiluvchi Sattorovlar hamda Abdullaevlar xonadoniga tashrif buyurdi.
Tashrif davomida har bir bolaning yoshi va qiziqishlari inobatga olingan holda tanlangan yangi yil sovg‘alari ulashildi.
Shu bilan birga, uzoq kutilgan bayram sovg‘alaridan tashqari bolajonlarga samimiyat va ezgu tilaklar jam bo‘lgan tabrik so‘zlari ham aytildi.
