Bilim ortiqcha bo‘lmaydi
Farg‘ona viloyati Furqat tumanida yashovchi Xurriyat va Ravshanjon Komilovlar – ijodsevar va yangi bilimlar o‘rganib, o‘z ijodkorlik qirralarini kengaytirishni yaxshi ko‘ruvchi insonlar. O‘zlari tashkil qilgan oilaviy bolalar uyiga qabul qilgan o‘n nafar o‘g‘il va qizlarini yangi bilim olishga qiziqtirishni maqsad qilib qo‘yishgan. Shu sababdan Komilovlar uyida ijodkorlik muhiti hukmronlik qilmoqda va bolalar hech ham zerikishmaydi.
Oilada kechki vaqtlarda kitob mutolaa qilish, ilmiy, qiziqarli ko‘rsatuv va filmlar tomosha qilish odatga aylangan. Qizlar tikish, bichish, to‘qish bilan shug‘ullanib, ota-onalari yordamida mazali taomlar tayyorlashni o‘rganishmoqda. Shuningdek, turli xil musiqa asboblarini chalishadi, bolalar esa rasm chizish, shaxmat o‘ynashadi, va muntazam jismoniy tarbiya bilan shug‘ullanishadi. Ota-onalari bolalarning istaklarini rag‘batlantirib turli xil to‘garaklarga, rassomlik, xorijiy tillar studiyasi va sport seksiyalariga qatnashishini taʼminlashadi. Xurriyat va Ravshanjonning aytishicha, bolalar nafaqat yangi narsalarni o‘rganishadi, balki ota-onalariga ustozlaridan o‘rgangan narsalarini o‘rgatishadi. Va eng muhimi, bolalar o‘z ustida doimiy ishlashga odatlanishadi.
